Sognefjordrennet vart ein suksess i godt vær. I år ville ikkje ungane stille, men eg kom meg opp på Fagereggji på 1004 moh og såg litt på hovudløypa. Ikkje noko for meg. Kenny Rogers synger passande i The Gambler:

You’ve got to know
when to hold them,
when to fold them,
when to walk away
and when to run..

Eg valde å køyre ned same vegen eg gjekk opp. Første delen, frå Fagereggji og ned til ca Raude Kross-boksen, gjekk greitt. Deifrå byrja anklane mine å fungere som vippebrytarar og skiene hogg tak ved ploging slik at faren for kryssing av skia var overhengande. Etter rimeleg kort tid mistenkte eg spora frå styreskiene til snøskooterane å vere årsaken. Styreskiene er forma som båtar med ein markert kjøl som skjer ned i snøen for å gi god styring. Etter kvart som skia passerte over slike endra vinkelen på anklane seg. Sidan snøskooterane hadde køyrt i preparert løype og øydelagt ho, bestemte eg meg for å prøve i laussnøen, ingen suksess. Rykk og napp takka vere vinden som hadde fordelt snøen ujamnt gjorde vanskeleg å halde seg oppreist.

Tilbake i preparert løype oppdaga eg at snøscooterane ikkje hadde køyrt på skuldra av den preparerte løypa. Eg sette utover og ned Rypeskar. Der, i botnen av det brattaste, hadde ein snøscooter svinga utom skuldera i ein svak bue før han hadde returnert mot senter av det preparerte. Eg prøvde å halde skiene rett framover, men venstre ski sokk nedi styreskisporet til scooteren. Med farten var katastrofen eit faktum. Tiendelssekund etter skia hadde teke feste kryssa ho den andre og sende meg ut i eit svev. Det var berre å late att augene og førebu seg på SMERTE.

Nedslaget kom hardt og brutalt. Det gjekk kast i kast med skia på. Det var ikkje så gale når eg reiste meg litt ør og forslått. Solbrillene var forvridde og ein plastglasset hadde sprukke og lausna frå feste. Ansiktet var litt ømt, men skaden kunne ikkje avdekkast sidan eg ikkje hadde spegel tilgjengeleg. Noterte meg ei blødning frå leppa, men elles fungerte resten kroppen bra.

No sit eg med to skrubbsår i panna. Kan lure på om nokon har saga av meg horna. Nasen har blodutredelsar over nasebeinet. Vertikalt frå leppa og opp mot nasa har eg eit sår. Kan ikkje kalle det ein kraftig sprekk, men det er no eit merke og sår som avga litt blod.

Ein ting er sikkert: Eg er tilhengar for eit skilje mellom turløyper og snøscooterløyper. Dersom dei ikkje har eigne løyper, får snøscooterane køyre opp sine eigne løyper!