Skribent: Arild Bjørk

https://bjrk.no/

Tur: Kjeringafjell i april

Arild BjørkKommenter innlegget

Skitur til Kjeringafjell startar på Kleppa, vel 5 kilometer frå Sognefjordvegen. Til turen må du hugse å ta med nok drikke og mat samt varme klede. Du skal opp frå ca 400 til 1.314 moh. Rekn med å bruke 3 timar på turen opp.

Frå Kleppa kan du gå på snøen opp til Øvstestølen. Deretter følgjer du løype fram til Damefall. Her stoppar du for å legge på feller eller smørje skia slik at dei klabbar skikkeleg. Frå Damefall vil du stige nesten 800 høgdemeter til Kjeringafjell og treng festet. Cirka 1 kilometer frå Damefall går du forbi stølen Stokksete før du går vidare til Kallbakk. Frå Kallbakk svingar du opp under Rjupeskar før du siktar deg inn på vestre del av Fagreggi. Oppe ved Fagreggi, må du ned i Discohola. Ikkje spør kvifor ein kallar det for Discohola, eg veit ikkje. I Discohola er det godt med ein matpause for å samle krefter til den kraftiga stiginga. Start roleg etter matpausen. Du skal frå ca 950 moh til 1150 moh på kort distanse. Det blir sikk-sakk opp fjellsida før du kjem opp ved varden på Kjeringi. Det er ikkje berre ulemper med den bratte stiginga. Tek du tida til å nyte utsikten medan du kviler på stavane frå tid til anna, vil du ha ei fantastisk utsikt som strekkjer seg frå Stølsheimen i vest og inn til Frønningen og munningen av Aurlandsfjorden.

Frå varden på Kjeringi er det litt motbakke att før du er på ca 1250 moh og skal til å runde over Skuledalen mot vardane på Kjeringafjell. I forhold til det du har vore gjennom er dette så godt som flatt terreng. I austre enden av Kjeringafjell finn du i 2016 radiobua. Frå Kjeringafjell har du ei fantastisk utsikt som strekkjer seg frå Balestrand og Stølsheimen i Vest og heilt til Jotunheimen med Hurrungane i aust. I nordleg retning har du Voggebreen og Myrdalsbreen med Friksdalen under Kjeringi. I sørleg retning ser du Hermansverk og Nokkaneset samt over til Feios, Borlaug, Fresvik, Frøninngen, Fimreite-neset og munningen av Aurlandsfjorden.

Etter ein god rast med god mat og drikke, er det berre å fjerne fellene eller smurningen å begi seg på turen ned att. Ta deg god tid til å sigle på sikk-sakk i dei brattaste partia for å nyte nedturen og utsikta.


I videoen går eg ikkje opp bratthenget, nordom Discohola, men følgjer ruta trakkemaskina nyttar for å koma opp dagane før Kjeringi Open.

Når ikkje ei einaste fjør blir til eit hønsehus…..

Arild BjørkKommenter innlegget
Det er ikkje til å tru, men her har vi eit grelt eksempel på propagandaen som Israel fører. Eg likar godt det han seier:

– Artikkelen er helt gal og jeg er forferdet. Jeg snakket med
journalisten lenge, i to omganger, og jeg sa det stikk motsatte. Men
det passet visst ikke inn i skjemaet hennes, sier Hercz til Dagbladet.

For meg indikerer dette at her har vi propagandamaskineriet i gong. Her skal det produserast løgner over ein lav sko. Eg skulle gjerne ha lirt or meg det eine og det andre, men eg må nok konkludere at her fell Israel for eige grep.

Vil du lese meir om dette kan de finne artikkelen i Dagbladet.

Musikkbransjen – sin eigen fiende?

Arild BjørkKommenter innlegget

Over tid har eg følgt med musikkbransjen si jakt på dei som lastar ned musikk. La meg gjere det klart: For meg er nedlasting av musikk og bruk av noko som du ikkje har rettar til eller har kjøpt, det same som tjuveri/nasking. Berre fordi ein ting ikkje er fysisk teken frå butikken, betyr ikkje at det er lovleg.

Eg skal ikkje legge skjul på at eg i lasta ned noko musikk for 3-4 år sidan, men konkluderte med at musikken var av alt for dårleg kvalitet. MP3 i 128 kbs er ikkje høyrandes på, med mindre det er ei lydbok. Ein misser for mange detaljar i lydbilete. Kassettspelaren kasta eg på 80-talet, så noko tilsvarande vil eg ikkje ha att. Aller helst vil eg ha ukomprimert lyd, men greier meg fint med MP3 i variabel bitrate frå 220 kbps til 320 kbps.

Problemet med musikkbransjen er at dei har drege føttene inn i den digitale tidsalder. I alt for lang tid har dei basert seg på at folk skal labbe vegen til ein musikkforretninger for å kjøpe musikken sin eller tinge musikken over internett for å få den i posten ei veke seinare. For dei på alder med meg, er ikkje det noko problem. Vi er van med å dette. Men for dagens ungdom og yngre vaksne, er ein vant til å nuet. Her har ikkje platebransjen følgt med i det heile. Dei burde fanga opp trendane lenge før Napster og lignande stadar dukka opp. Folk vil ha produkta sine tilgjengeleg.

Eg prøvde dei første idiotiske forsøka til platebransjen. Eg veit ikkje kven som greidde å overtale dei, men DRM er “defective by design”. Dei som valde å implementere dette, kan ikkje vere forbrukarar av musikk. Eg ser for meg kvinner og menn i drakt og dress med hovudfag innafor økonomi og juridikum, så langt unna den gjennomsnittlege forbrukar som det går an å kome.

Eg har kjøpt 2 plater i Windows Media Audio med DRM. Ei til meg sjølv, for å teste DRM. Som eg forventa, fungerte ikkje musikken når eg skifta maskin og då måtte eg laste ned ein ny lisens på musikken. Eg skiftar utstyr ofte, så eg fann ut at DRM ville gjere musikken utilgjengeleg innan rimeleg kort tid. Det blei ikkje kjøpt meir. Eg tykkjer synd på dei som har kjøpt i store mengder for så å oppdage at musikken ikkje lenger kan spelast. Musikkforretningen din på nettet er lagt ned og du kan ikkje få tak i ny lisens for å låse opp musikken.

La meg dra fram eit anna problem med for bransjen: Eg har masse vinyl ståande, men har kvitta meg med platespelaren. Det er fleire årsaker til det. Eg er interessert i å kjøpe att ein del musikk i form av cd eller som nedlastbar. Problemet er at svært lite av dette er tilgjengeleg. Musikken er ikkje av den siste typen med 50-åringar springane rundt som 20-åringar. La meg ta nokre eksempel:

Smokie
Albuma frå 70-talet er plater med masse god musikk. For nokre år sidan ville eg kjøpe alle desse platene, men det var eit stor problem. Til og med i dag kan du ikkje få desse platene via iTunes. Eg ser at Amazon har CDar, men er usikker på om alle er på plass. Det blir alt for mykje “samleskrammel”. Eg noterer meg at CDon truleg har mesteparten av platene i dag, til 159 pr stk. Det er bra. På tida eg jakta etter dei, greidde eg ikkje å platene. Det kan vere at eg leitte på feil plassar. Eg kunne naturlegvis ha lasta dei ned gratis via ei eller anna fildeling, men kvaliteten er for dårleg. Då var løysinga allofmp3, som no er nedlagt. Her kunne eg velje kva for kvalitet eg ville ha og betale deretter.

Ronnie James Dio
Ein liten mann – fysisk – innafor heavy metal, men for ei stor stemme og lang karriere. Eg vil gjerne samle på platene han har vore med på. Plater med Rainbow, Black Sabbath og Dio, har ikkje vore problem å få tak i. Derimot har plater med gruppa Elf, som han var med i før Rainbow, ikkje vore lett å få tak i. Heller ikkje her finn du platene på iTunes. Ikkje ligg dei på CDon. Ser at Amazon har tilgjengeleg 2 av platene i dag. Som med Smokie vart allofmp3 løysinga. Berre velje kvalitet, betale og laste ned.

Whitesnake
David Coverdale sitt band var heller ikkje enkelt å få tak, når eg skulle erstatte vinylsamlinga. Det meste greidde eg over tid å skaffe via CDon, men det første fulle albumet med Whitesnake, var klin umogleg å få tak i. Eg søkte på internett, spurte den lokale musikkbutikken om dei kunne skaffe det, men nei. Det var som sokke i jorda. Allofmp3 vart redninga igjen. Heldigvis har “Trouble”, vorte relansert, så det vart kjøpt att på ordinær cd.

Status Quo
Boogierockarane som framleis held koken, slepte på 70-talet og i byrjinga av 80-talet mange album. Du må vere daud om du ikkje kjenner det i rockefoten. Som med Whitesnake, Smokie og Elf var det rimeleg umogleg å skaffe i det minste ei plate, Just Supposin’, frå 1980. No var ikkje det ikkje dei eg høyrde mest, så her vart det ikkje prioritert å kjøpe musikken frå allofmp3. Heldigvis vart platene frå 70-talet relansert for nokre år sidan. No står Just Supposin’ i samlinga som ordinær cd.

Motörhead
Her har eg ikkje hatt problem med å skaffe platene, men ei tid ønskte eg berre å få tak i dei 4 ekstra spora på plata samleplata No Remorse frå 1984. Det var plent umogleg, så det enda med at eg kjøpte heile plata.

For meg har MP3-spelaren ført til ein ny vår i lytting til musikk. Når ein er fleire i huset, er det ikkje så populært å setje seg ned og skru opp. Men ein god mp3-spelar, musikk av komprimert i svært høg kvalitet og eit godt headset, er det berre å legge ut på tur. Det er ingen som forstyrrer deg på di ferd samstundes som du får litt trim. Så hendig det er med 100vis av plater i ein liten dings på storleik med eit stort kredittkort, for ikkje å snakke om at musikken aldri hoppar eller lagar bandsalat. Eg trur faktisk ikkje musikkbransjen har forstått potensiale av denne oppfinninga.

La oss få tilgang til komplett musikkatalog i full cd-kvalitet no. Pøs på, slepp han utan idiotiske låsar til maskiner eller spelarar. Gi oss det i FLAC (free lossless audio codec). Eg vil velje kva for kvalitet vil vil ha det over på spelaren i. I det minste: Kvifor tilbyr ikkje platebransjen ei løysing som allofmp3 hadde, der ein betalte etter kvaliteten ein ønskte?

Som venta….

Arild BjørkKommenter innlegget
Dagbladet refererer ein statsvitar og forfattar i Israel. Tabloidmessig meinar han at nordmenn er eit barbarisk og uintelligent folkeferd, med ein sjukeleg trang til å trosse
verdsopinionen. Som vanleg blant desse, så vert andre verdskrigkortet spelt:

Det er ikke tilfeldig at Norges eneste bidrag til internasjonal statsvitenskap er navnet «Quisling», sier han.

No er eg ikkje sterk i historie, men eg meinar å hugse av barbariet forsvann med vikingepoken. Vi har vel hatt våre slag sidan den gong, men i forhold til vikingtida, har eg ikkje lagt merke til stort. Ja, vi var barbariske, men det er mange hundre år sidan den gong. Kan vi tolke dette som at vi fann ut at det var for krevjande å fare rundt om i Europa og Nord Amerika og herje, som villmenn. Kan vi dra konklusjonen at vi vart klokare? Ser vi nasjonar i dag som driv barbari? Det er ikkje mange månadane sidan paven karakteriserte Gaza som ein stor konsentrasjonsleir.

Som vanleg blir verdskrigkortet spelt ut. Uttrydding av alle typar folkeslag er utåleleg. Som under andre verdskrig, var det like gale i Rwanda i nyare tid. Kortet har ingen verdi for meg. Det skal ikkje gi Israel blankofullmakt til herje som dei vil. På ingen måte får det meg til å føle synd på dei, eller sjå dei som stakkarslege i notida.

Vi trassar verdsopinionen. Vel, har min gode mann nokon gong lese eventyret "Keiserens nye klær". Vi har i nesten 8 år hatt ein person i førarsetet av ein stor nasjon som har spelt på denne måten: Anten er du med oss eller mot oss. Dersom du er mot oss, vil vi ikkje snakke med deg. Du er ein terrorist. Har vi fått det betre av den grunn? Har andre land som har følgt denne lina fått det betre? Ein manns terrorist er ein anna manns fridomskjempar. Kor hadde vi vore om ikkje fridomskjemparane hadde vunne fram under andre verdskrig?

Det er heilt absurd å ikkje lytte og snakke med andre folk, for å prøve å kome til rota av kva som har forårsaka situasjonen ein er oppe i. Endå verre blir det når den store leiaren fremmar demokrati og ei regjering blir demokratisk valt for så å bli definert som terroristar. Ein må heller sjå at vi har eit problem dersom ein får polariseringar. Eg har inga tru på at verda blir betre fordi vi bombar nokon tilbake til steinalderen. Det nører berre meir opp under eit underliggande hat og/eller avsky. Problem må løysast gjennom dialogar for å danne eit felles grunnlag for fred.

Å gjere lekser eller ikkje…..

Arild BjørkKommenter innlegget

Det er ikkje til å tru kva enkelte greier å få til å sei. Det kan godt vere at det er journalisten som har vinkla det litt skarpt for å sikre at mediet held fram med å vere «økonomisk levedyktig» i desse tider. Å hevde at lekser ikkje har effekt og at det i tillegg, no sist, blir vinkla som at eleven og studenten med lov, eller rettar sagt utan, lova i hand kan hevde at han/ho ikkje er pliktig å gjere lekser…. Vel, eg er mållaus. Det virkar som om nokon har opna kjeften utan å setje hjernen i gir. 

Det er mogleg at eg er gamaldags og rar, men eg er av den oppfatninga at skal du bli skikkeleg god i noko, må du øve eller trene. Yngwe Malmsteen, Joe Satriani, Steve Vai med fleire gitaristar får ikkje fingrane til å flyge over strengane og banda med å spele World of Warcraft eller rotne vekk framfor TVen. Bjørn Dæhlie med fleire fekk ikkje opp farten ved å søkke djupt ned i sofaen etter at klokka har passert 16.00. Du set ikkje utfor Kitzbuel utan eit solid treningsgrunnlag, med mindre du har eit ønskje om å forlate jorda. Ein sjakkspelar blir ikkje god fordi han veit at tårnet kan flyttast horisontalt eller vertikalt, han må ha spela mange spel for å kunne analysere spelet godt. Skal vi oppleve at trening før kl 08.00 og etter kl 16.00 blir sett på som doping?

La meg få sleppe å høyre at ein eller anna seier at lekser ikkje er til hjelp. Eg har ikkje det minste tru på hypotesa. Eventuelle datagrunnlag for slike analyser på gjennomgåast på nytt og det må gjerast studie på studie for å endeleg slå fast denne teorien.

Dette kan ikkje vere ei godt kjensle

Arild BjørkKommenter innlegget
Nyhende frå den tabloide verden bør ein ta med ei klype salt. Stemmer dette:

http://www.vg.no/teknologi/artikkel.php?artid=540506
It-avdelingen i Nord-Trøndelag får nå hjelp av Microsoft og Norman Antivirus. Andre aktører har også tilbudt sin hjelp.

er det ikkje lystig for driftsansvarleg eller leverandørar. For den kunnige er ikkje Windows det store hinderet. Verre er det for dei som har vorte sett til å sikre det. Men at Norman, som skryt av sin Sandbox-teknologi, ikkje greier å passe på dette, synes eg er skremande.

No er det nok, Pinnacle Studio 11 Plus

Arild BjørkKommenter innlegget

Pinnacle Studio 11 Plus er det dårlegaste programmet eg har kjøpt. Eg har tidlegare fortalt om mine problem i dette innlegget.Denne helga skulle eg gjere ferdig ca 32 minutt med nedredigert materiale frå juleavslutninga for 3. og 4. klasse ved Leikanger Barneskule. Eg fekk nettopp tak i video som vart brukt under spelet i Windows Media-format som siste bit i puslespelet. Han vart lagt til og overgangar lagt inn, som vanleg, og so byrja moroa eller rettar sak problema. Alt såg ut til å vere bra heilt fram til slutten på videoen i Windows Media-format ved rendering til MPG2 for DVD. Når Pinnacle Studio 11 Plus kom til klippet etter, som er i AVCHD, bestemte Pinnacle Studio 11 Plus seg for å bruke bilete frå dette klippet, men lyden frå klippet etter det. Uansett om eg flytte litt på overgangane, så vart det ikkje i orden. Problemet løyste eg ved å kutte videoen i 2 deler. Del 1 går fram til slutten på videoen i Windows Media-format, medan klippet som gjorde Pinnacle schizofren startar del 2.Eg trudde no at alt var i orden og komponerte ein prøve-DVD med avslutningane for 1 – 4 klasse. Prøvevisinga avslørte at det har eit «hikk» i del 1 etter ca 4 sekund som gjorde at video og lyd vart ute av synk fram til neste overgang. Eg stussa fælt på kva det var som gjorde det, men hadde ein mistanke til at det var teksten som ligg over dei første 4 sekundane av første klippet som gav problem. Eg reduserte tiden på teksten, fjerna effektar som låg på teksten, la på utfading og valde å starte førsteklippet nokre bilete før, utan at noko var til hjelp. Til slutt løyste eg det ved å la teksten vere det første klippet utan å vere kombinert med anna video.

Tolmodet med Pinnacle Studio 11 Plus er slutt. Pinnacle skal få ein siste sjanse. Eg har tinga Pinnacle Studio 12 Plus. Det ser ut til at 12aren kan vere noko betre til å redigere video i AVCHD-format. 11aren har vore eit mareritt. Der eg før kunne lite på at alt var bra ved redigering av DV-video i 9aren, har eg no måtte kontrollere alle videoklipp etter rendering eller som prøve-dvd. 11aren har vore utruleg tidkrevjande og arbeidssam. Det har teke tid å løyse ulike renderingsproblem. Eg får håpe at 12aren er betre. Er han ikkje det, vil eg gå over til redigeringsprogram frå andre leverandørar. Eg har Sony, Adobe og minst eit til alternativ i kikkerten. Tilliten til Pinnacle er tynnslitt.

AMD ikkje bra nok for bærbare

Arild BjørkKommenter innlegget

Eg har lagt merke til at mange butikkar tilbyr eit stort utval av maskiner som baserer seg på berbare X2 eller dei nye Puma-baserte prosessorane til AMD. Det er synd å sjå korleis AMD har vorte akterutseilt på prosessorfronten. Det var ei tid når Intel snubla og satsa på Rambus-minne og alt gjekk på tverke med Pentium IV. AMD segla inn og fekk på plass sine X2-prosessorar som utklassa dei. No er bordet snudd. På stasjonere PCar er dei i bakleksa. Det ser heller ikkje ut til at det går noko betre på prosessorar til berbare maskiner. Ta ein titt på denne samanlikninga mellom AMD Puma og Intel Centrino 2. For meg er det spesielt HD Transcoding som er det viktigaste ved redigering av AVCHD video. Intel totalt knuser AMD. Det blir nok ikkje noko betre no når Intel er på bana med prosessorar med fire kjerner for berbare PCar.