Setebeltefesta og fotplate som knirka er skifta. Undersøkinga av klimaanlegget viste at systemet mangla 2/3 av gassen og forhandlar meinte at det var kompressoren som var årsaken til lekkasjen. Dei ville ta kontakt med meg når dei visste leveransetid på delen.
So kjem det som overraska meg. Eg dokumenterte og delte fleire bilete av kodens i ny spoiler. Når eg skulle hente bilen, plinga det opp ei melding på telefonen om betaling av kr 375 (300+mva). Snakka med kundemottak og det var visst minstetakst på feilsøking. I dette tilfelle hadde forhandlar ikkje greidd å stadfesta mine funn som eg dokumenterte og delte med dei.
Vel, tenkte eg med meg sjølv. Dette er eg ikkje einig i, men eg valde å tige og betale. Kr 375 veltar ikkje budsjettet mitt. Tenkte at eg får krevje det refundert det når/om lykt i spoiler må skiftast for andre gong. Har vore ute for at dei ikkje greidde stadfeste kondensen i 2024 i gamle lykta som blei skift tidlegare i år.
Vart merksam på utfordringa rundt LG-TVar før sommaren. Såg over avtalar LG bad meg akseptere i innstilligane til TVen og vart uroa. Eg har ikkje den mest avanserte LG-TVen, men han kan brukast til å sjekke kva eg ser på ved gjenkjenning av det som blir vist. Dei meir avanserte har mikrofon som gjer at TVen kan kome til å lytte til deg lenge.
Etter å ha gått gjennom avtalane i bilete over har eg valt å berre akseptere berre ein avtale som må til for å bruke TVen. Alt anna har eg ikkje godkjent. Er du meir skeptisk enn meg, kan det vere lurt å ikkje kople LG-TVen til internett og heller bruke ein anna TV-boks som mediasenter. Berre kople til TVen sporadisk til internett for å oppdatere programvaren. Aller helst gjer det med kabel slik at TVen ikkje tek vare på passordet til eit trådlaust nettverk. Alternativ kan det vere eit separat trådlaust nettverk som er slege av før og etter oppdateringa slik at TVen aldri kan nå noko eksternt.
Gamer Nexus og Level1Techs, to ekstremt dyktige og tekniske kyndige kanalar, har gått djupna på LG sine TVar. Her kan du få med deg 2 timar og 15 minutt med grundig detektivarbeid.
Om 2 timar og 15 minutt med mykje teknisk engelsk blir for mykje av det gode, kan du heller ta ei kort oppsummeringa frå Nikka Systems Sverige (på svensk):
Om du trur berre LG spionerer på deg, tenk om. Nei, det virkar som om det er eit opplegg for å kunne levere ein rimeleg TV som nett som gratis-tenester på nettet kartlegger deg for mellom anna servere deg relevante annonser. Når du kjøper ein billig TV, er du produktet.
Tilbake til Gamer Nexus og Level1Techs og LG sin tilbakemelding på deira undersøking. Kort og godt er dette ikkje eit tillitsvekkande svar frå LG. Når dei vert tekne med buksa nede, seier dei at det ikkje er sant. Liknar mistenkjeleg på kva andre gjer i dag, men Gamer Nexus og Level1Techs er klare i sitt svar.
Deja Vu. Hadde problem med kondens inne i lykta på spoileren sidan 2024. Fekk bytt på garanti lykta i sommar. Den 10.9.26 slengde eg eit blikk på den nye spoileren og jammen har ikkje den nye lykta fått kondens i seg. Blir nok ein runde med å få skifta lykta ut på garanti igjen. Er absolutt ikkje nøgd med kvalitetskontrollen hos Hyundai. Dette er ikkje det eg forventa når eg kjøpte bilen.
I dag fekk eg brev frå Hyundai på ei tilbakekalling. No er ei tilbakekalling noko positivt. Det er viktig å ta tak i det som kan utgjere ein risiko for ein eigar av bilen. Men i det store bildet av bilen min og modellen, får tilliten nok eit eksempel på at kvaliteten ikkje var god nok i utgongspunktet. Du får lese alt eg har skrive om problem. Einaste trøsta er at kvaliteten på framdriftsbatteria til Hyundai er statistisk sett av beste kvalitet.
PS! Legg merke til at dei refererer til Hyundai Ioniq 9 og ikkje 6 i brevet. Eg tok ein ekstra sjekk. Både registereringsnummeret og understellsnummeret stemmer med bilen min, ein Hyundai Ioniq 6.
Det er lenge sidan eg har mista tillita til Hyundai som leverandør av kvalitet. Bilen er no på tredje ICCU og er dritlei lange turar berre for å få sjekka og i neste tur fiksa feil. I tillegg til ICCU har det vore skifte av bremselys integrert i spoiler som følgje av fukt på innsida, knirking i sete og interiør og ustabil Apple CarPlay. Når heile bilen sviktar frå maskinvare til programvare, blir det slitsamt.
Eg har slutta å telje turane til forhandlar for å få fiksa ting. Forhandlar gjer så godt dei kan, men eg er ikkje nøgd med korleis Hyundai har handtert den velkjente saka om ICCU. Statistisk hevdar dei at 10% av bilane er påvirka, men når bilen min har skifta to ICCUar og er på den tredje, må eg vere unntaket. Aldri har Hyundai strekt ut ei hand og tilbydd meg nokon form for kompensasjon eller «plaster på såret». Men som eg har sagt tidlegare, svidd kunde er tapt kunde.
Sommaren 2026 har vore begredeleg her vest. Kaldt og vått ver har prega sommaren, men i juli hadde vi nokre varme dagar. Eg var på fjelltur. Bilen stod og varma seg godt opp i sola. På veg tilbake starta eg kjøleanlegget med appen i god tid (10 min) før eg kom til bilen, men temperaturen var ikkje gått ned. Virka som om anlegget blas utelufta inn og ikkje kjølte ho merkbart. Sidan bilen vanlegvis står i garasje, skjerma for sol og sommaren har vore kald, har det blitt lite praktisk testing i etterkant. Men har merka at anlegget ikkje er heilt godt og passasjersona bles til tider kaldare enn førarsona.
Onsdag denne veka gjorde eg ein ny test. Bilen hadde stått ute i sola i fleire timar. I appen sette eg temperaturen på aircondition til 17 grader og venta i 10 minutt. Bilen var ikkje mykje kjølt. Merka at på førarsida blas berre uteluft inn, utan noko form for kjøling. Eg køyrde ein tur og etterkvart la eg merke til at det var kjølig på passasjersida, medan på førarsida var det framleis inga kjøling av lufta. Alle innstillingar vart sjekka, aircon og sync er på og displayet viste 17 grader (for begge soner).
Var nett utom Leikanger Auto AS og tok ein kjapp prat. Mekanikar kjende etter og kjende kalde aircon-røyrer under panseret på bilen. Trudde ikkje det var mangel på gass. Sidan det var vanleg luft på førarsida og kjøling på passasjersida, meinte han at det kunne vere eit spjeld eller noko som sytte for fordeling av kjøling som ikkje fungerte skikkeleg. La til at han ikkje syntes temperaturen på passasjersida var ikkje kald nok. For min eigen del synes eg heller ikkje kjølinga er bra. Vi har ein eldre bil og når ein set aircondition på kaldast er det plagsomt kaldt. Fordelen er at varmen forsvinn fort. Det gjer den ikkje i Ioniq 6en min.
Etterkvart kom det kjøling på førarsida, men veit ikkje kva som gjord det. Men i høve passasjersida, var kjølinga på førarsida ikkje like sterk. Ny tur for kontroll av aircondition er tinga og nærare 4 timar i bil berre for å kome dit. Er eg heldig må ein tur til for å få det fiksa. Ser for meg 7-8 timar i bil, to fridagar og 500 km før dette blir retta.
Kom over denne artikkelen hos Elbil24. Ein stor svensk bruktbilforhandlar, Carla, har analysert framdriftsbatteriet til 9 554 brukte elbilar som har køyrt meir enn 100 000 km i løpet av perioden mellom 2022 og 2026. Dei har sett på restkapasiteten av i høve nytt batteri. Tabellen er ei positiv lesing for dei samarbeidande, koreanske merka Hyundai og Kia.
På toppen finn du dei trauste «søskena» Hyundai Kona og Kia e-Niro som nyttar det same 400-volts batteriet på 64 kWh. Restkapasiteten etter over 100 000 km er på 97,2%. No finn eg ikkje Hyundai Ioniq 6 i lista. Bilen har ikkje den vanlega «cross over» eller suv-utforminga og er nok ikkje populær nok til å kome på lista. Men søskenet, Kia EV6, som nyttar det same batteriet som min Hyundai Ioniq 6, kjem på tredje plass med ein restkapasitet tett opp under 96%.
Alt tilseie at koreanske modellar har svært gode framdriftsbatteri.
Eg hoppar mellom ulike musikktenester for å sjå kva som passar meg best. Akkurat no abonnerer eg på Apple Music, men kunne tenkt noko anna. Etter fleire forsøk har ikkje greidd å få tak på brukargrensesnittet eller måten Apple Music gjer ting på. Eg har ein klar favoritt i Spotify, men Youtube Music er eit alternativ som under Youtube Premium tilbyr både musikk samt at innholdsleverandørane på Youtube får noko lite for kvar video eg tittar på saman med at eg slepp å sjå tankelause annonser. Problemet med Youtube Music er at det er fullt av uoffisielle utgivningar samt bøtter og spann med AI-musikk.
Om det første kan du ta ein titt på album til Elvis Presley på Youtube Music kontra Spotify. For sistnemnde har eg kontroll på det som er publisert, men på Youtube Music er det så mykje at eg stiller spørsmål på kvalitetssikringa. Eg lurer på om alt er lisensiert. Det kan ikkje vere slik at «Hvermansen» kan publisere kva som helst av ein artist, eller?
Ta ein titt på bilete over som følgjer artikkelen. Du kan rimeleg enkelt sirkle det meste av det som er AI-musikk etter bileta. Klikk gjerne gjennom dagens liste på Youtube og du vil fort finne «AI-artistar» på bilete. I tillegg vil du kunne ta dei andre på publiseringsfrekvens. Det er ingen som gir ut mange album og singlar per år. Når det er mange publiseringar av musikk av ein «artist» i løpet av eitt år, bør det ringe nokre klokker.
Eg har inga interesse av AI-musikk, eg likar musikk som blir komponert av mennesker og spela av nokon med hjarteslag. Skulle gjerne gått over til Youtube Music, men eg kjenner at det byr meg mot. Eg må bruke energi for å sortere AI og uoffisielle publiseringar frå det originale og genuine. Kan ikkje sei at eg er oppdaga nokon måte å få vekk det uoffisielle eller AI-musikken.
I siste halvdel av mai var eg på ein lang biltur nordover på totalt 7500 km. På den tid brukte eg ein Samsung S25 FE og Android Auto til navigasjon og mediasenter. Her finn eg Google Maps, lydbok-, radio-, musikkappar ned meir. Alt kan styrast via stemma. Når eg køyrer bil, vil eg unngå å ta auga vekk frå vegen for mykje. Tredjepartsløysingar som Android Auto og Apple CarPlay er langt betre enn produsenten si løysing.
Etter ferien bytte eg over til Apple iPhone 16 og Apple CarPlay. Telefonen vart kjøpt i romjula 2025 og har sporadisk vore nytta som reservetelefon inntil overgangen. På tidspunktet for byttet var telefonen oppdatert til iOS 26.5. Problemet var og er at Apple CarPlay er ustabilt som eit korthus. Kan virke fint ei tid før CarPlay blir kopla frå. Ein endar opp i ein runddans med fråkoplingar før ein greier å kople til at ei kort stund. I verste fall vil ikkje CarPlay bli aktivt igjen. Bilen seier leser USB-eining og så stoppar det, ingen CarPlay. Står bilen ei lengre tid, f.eks. over natta, kan det fungere igjen som om intet har skjedd.
I slutten av juni 2026 kom iOS 26.5.2. Virka som det vart noko meir stabilt, sjølv om når eg les versjonsnotatet er det for det meste feilrettingar ikkje direkte knytt til CarPlay. Innholdet i versjonsnotatet tyder på at dei kan ha køyrt Anthropic Mythos mot kildekoden for å finne sårbarheiter og fiksa dei verste. Utan at eg kan forklare det har CarPlay virka meir stabilt og det har vore periodar eg har lurt på om det kunne vere ordna, men så kjem det att. Apple CarPlay blir kopla frå og det hender at eg ikkje greier å få det aktivt att, jf. førre avsnitt.
Søndag og mandag køyrde eg nokre lengre turar for å teste CarPlay. Søndag vitja eg Framfjord og Arnafjord. På veg heim vart CarPlay ustabil. Bilen hadde vore i drift eller hatt køyretid nokre timar. Om kvelden på søndag oppdaga eg ei ny oppdatering av infotainmentsystemet til bilen. Eg lasta ned, klargjorde og installerte oppdateringa på bilen. Klar fordel at eg har arbeidd med datamaskiner sidan tidleg 80-tall. Mandag tok eg ein lengre tur i Jostedalen. Hadde nesten friskmeldt CarPlay, men nett før eg kom ned att til Gaupne og bilen hadde vore i aktivitet/køyretid i nesten 3 timar, starta ustabiliteten igjen. Med andre ord har bilen hatt køyretid nokre timar, nett som dagen før.
Bytte telefon til Samsung S25 FE og Android Auto. Telefonen kopla seg til bilen og det var ingen problem med stabilitet for Android Auto. Køyrde eit lite stykke og tenkte at kanskje det var noko i iOS som vart utstabilt etter nokre timar. Køyrde til sides, slo eg av og på Apple iPhone 16 før eg kopla han til bilen. CarPlay stabil frå Årøy-svingane og heim, rundt 30 minutt køyring.
Tirsdag var eg ikkje på lengre tur. Eg køyrde litt rundt i bygda samt eg var ein kort tur til Sogndal for å handle innersålar til skoa. Turen tek berre på 20 minutt kvar veg. Utpå dagen fekk eg igjen problem med Apple CarPlay. Gjorde eit nytt forsøk der eg slo av telefonen ei lita tid før eg slo han på att. Når han kopla seg til att, var CarPlay framleis ustabilt. Gjennomførte ein restart av infotainmentsystemet også utan at det heller løyste ustabiliteten.
I dag har eg småkøyrt litt her i bygda. Usikker på om eg merka ustabiliteten tidleg på dagen, men no i kveld når eg starta bilen starta Carplay å tulle med ein gong. Fann fram kulepennen og restarta infotainmentsystemet i bilen. Når det kom opp igjen, kopla Apple CarPlay seg opp og etter den vel mil lange turen var systemet stabilt.
Oppdatering 16.7: Ustabliteten starta omtrent med ein gong eg rygga ut av garasjen. Eit par gonger restart av infotainmentsystem på bilen samt forsøk på å slå av blåtann og wifi på telefon for å kople til igjen. Intet av det eg gjorde fiksa det. Fiska fram ein USB-kabel og kopla til. Virka til å vere stabilt og gjekk difor tilbake til trådlaus duppeditten som gjer at eg slepp kabel og no virka det stabilt dei 10 minuttane eg køyre rundt i nærområde. Det merkeleg er at eg ikkje finn ein heilt klar faktor som kan utløyse ustabiliteten. Nokon gonger tyder det på bilen, andre gonger tyder det på telefonen.
Kort oppsummert har eg gjort følgjande for å forsøke å få det stabilt:
Reingjort USB-A-port.
Testa og funne at sjølve USB-A-porten på bilen virkar stabil. Greier ikkje å få provosert fram fråkopling ved å lee lett på kontakten som står i porten.
Sytt for at Apple iPhone 16 er oppdatert med siste programvare.
Sytt for at infotainmentsystem til bilen er oppdatert med siste programvare.
Fjerna paring av telefon og para han att med Carplay fleire gonger, sist etter oppdatering av bilen sitt infotainmentsystem.
Testa mange ulike kablar, korte som lange, rimelige til dyre USB-3-kablar som kan lade PCar med 240 watt.
Testa USB-C-port på Apple iPhone og ikkje funne ustabilitet.
Testa med to ulike adapter som gjer det mogleg å konvertere bilen sin kabla Android Auto og Apple Carplay til trådlaus. Eit av adaptera har ikkje kabel slik at det er eliminert heilt USB-kabel.
Testa restart av iPhone i tilfelle det er ein feil i iOS som etter tid skapar ustabilitet.
Testa restartar av infotainmentsystem ved å trykke den tilbaketrekte restart-knappen på infotainmentsystem når Carplay blir ustabil.
Sikker på at det IKKJE kjem av at telefonen blir for heit når han ligg på ladeplata.
Ser ut til at eg ikkje er aleine med problema med Apple Carplay:
Vi gjekk til Austerdalsbreen i juli 2018. Eg har vurdert om eg skal ta turen igjen i år for å sjå på endringane. Tilfeldigvis fekk eg eit framlegg om å sjå ein video som er filma no i sommar om turen fram til Austerdalsbreen:
Sjølve framsida på videoen seier alt. Eg er mildt sagt overraska over kor mykje breen har trekt seg tilbake. Det er nesten som eg må ta turen sjølv sidan det nesten ikkje er til å tru. La oss samanlikna mine bilete frå 2018, så forstår du kvifor:
Heilt tydeleg at det var mykje meir is i 2018. Har du tenkt deg til Austerdalsbreen gjer du det i år eller neste år. Om 8 år har han trekt seg opp fjellsida, nett som Briksdalsbreen gjorde for mange år sidan.
Arild Bjørk 