Siste dag på hjul. Turen tek oss gjennom Trondheim før vi set retning mot Dovre. Fine, breie motorvegar i nærleiken av Trondheim, berre synd at det varer ikkje lenge før vi er over på landeveg av ymse kvalitet, men som oftast mykje betre enn her på Vestlandet.

Turen er ein transportetappe vi har gjort fleire gonger før. Kome oss opp og over Dovre, ned til Sel for å krysse over til Vågåmo og vidare til Lom. Siste etappen over Sognefjellet, ein nasjonal turistveg, kan vere folksam til tider. Ikkje er vegen av dei breiaste som kan by på utfordringar når store køyretøy møter kvarandre. Ikkje har den dei slakaste stigningane heller så fullasta bilar med liten motor blir sinker og lagar kø.

Men vi har køyrt vegen så mange gonger, begge veger, at vi har oversikt over når ein kan kome forbi og plassar ein kan køyre ut om ein møter nokon som er redd for grøftekanten over fjellet eller langs Lustrafjorden.