Eg har vore innom det meste. På 80-talet og utover var det parabol med innslag av bakkesendar som regjerte. TV via fiber tok eg aldri sjansen på. Det var rett og slett for dyrt. I tillegg var tilbakemeldingane heromkring så dårlege at det uansett ikkje hadde vore aktuelt.

I ungdomen var det spanande å få inn noko meir enn NRK, men etter kvart har det vorte mindre og mindre interessant. Eg har aldri hatt behovet for 57 kanalar med ingen ting på. Om so var, gav det seg etter 1 veke på 80-talet. Å betale for ein pakke med mange kanalar gav eg opp for ein del år sidan, nokre få kanalar fekk greie seg.

I vinter kvitta eg med det tradisjonelle tv-abonnement, og kan no berre få inn NRK via RiksTV. Eg ville gå utanom tradisjonelle TV-distributørane og rett på leverandørane. Det skal vere opp til meg kva eg vil sjå på. Eg vil ikkje koma til ein ferdigdekka meny med kanalar, der over halvparten er så godt som uinteressante. Eg vil teikne meg for eit abonnement med leverandør på nokre månadar med enkel på og avmelding. Eg treng ikkje meir enn eit par månadar med Amazon Prime når vil sjå siste serie av Grand Tour med Clarkson, May og Hammond.

AppleTV gjer det leikande lett både med betalt og og gratis tilbod (f. eks. Youtube). OK, eg må ha ein PC til å setje opp kontoen. For meg er det enklast og sikrast. Det beste av alt med den nye TV-kvardagen er at eg får tilgang til programarkivet til leverandørane. Er det eit program eller episode i ein programserie eg ikkje har fått med meg, er det berre å sjå det når det passar meg.

Programarkivet til leverandørane varierer i omfang og kvalitet, men kanskje det viktigaste med endringa er at eg (og famlien) får tilgang til arkivet til NRK. Det er då du skjønar at lisensen faktisk er verd pengane. App’en til NRK er glimrande, spoling i direktesending problemfri. Du kan hoppe inn når som helst dei siste 3 timane i sendeskjema. Har programmet starta, tilbyr app’en å starte frå byrjinga av programmet eller gå direkte inn på sendinga som pågår. Ein treng ikkje følgje klokka med milimeterjustis for å få med seg programmet. Vi kan ta ein tur i det fine veret og sjå programmet ein anna dag.

Denne helga blei livlig. WannaCrypt (WC) slo ned og herja med filene til offera. Så lenge du hadde gjort same feila, viste WC ingen nåde om du var lekmann/-kvinne eller profesjonell aktør. Filene dine vart kryptert og du vart presentert krav om løysepengar på ca 300 USD i løysepengar. Betalar du ikkje innan den første fristen får du ein ny frist, men beløpet aukar. Om du ikkje betaler, vil filene gå tapt.

WC ser ut til å ha kome i e-postar og blitt aktivert ved at ein klikkar på lenker som er noko anna enn dei gir seg ut for. I tillegg hadde det, takka vere ein svakheit i Windows, som Microsoft fjerna i mars 2017, stor evne til å spreie seg i nettverk der maskinene ikkje var oppdaterte.

WC søker etter filer/dokument/bilete/video osv på maskina sine eigne diskar, eksterne diskar og diskar/ressursar på nettet. Alt WC finn vil den forsøke å låse ned. Nokre tips:

• Hald systema dine oppdatert. Køyr eit operativsystem som framleis er støtta av leverandør og syt for at det får automatiske oppdateringar. Er du på Windows XP eller Vista, kjøp ny maskin. Maskinene i dag kjem med siste Windows som vert aktivt vedlikehalden. På maskinvarenivå har det også skjedd mykje for å forhindre skadevare/root kits!
• Bruk profesjonelle levarandørar av e-post. Dei har system for å filtrere ut skadevare effektivt.
• Alltid undersøk lenker i e-postar, til og med dei som ser ut til å kome frå kjente avsendarar. I e-post kan ting sjå annleis ut enn det faktisk er. Avsendar kan forfalskast. Lenker kan få ein anna tekst, som klikk her, enn den verkelege adressa. Undersøk alltid lenka ved å halde musepeikaren over ho. Adressa til lenka vil du sjå nede på statuslina i nettlesar eller e-postprogram. Er du i tvil skal du aldri klikke på lenka!
• To brukarkonti på maskin(ene dine):
  1. Standarbrukar som du brukar til dagen.
  2. Administrator til å installere programvare og systemendringar.
• Ha backup liggande på diskar eller i skya som IKKJE er kopla til maskin(ene) heile tida. Ei teneste for synkronisering som Dropbox, OneDrive, GoogleDrive osv standard oppsett er ikkje god nok. Filer på PCen vert kryptert, orginalane sletta og alt synkronisert opp i skya.
• Dei siste versjonane av Windows har eigen anti-virus, men det kan vere lurt å undersøke om det er andre aktørar som har betre løysingar.

Om du tykkjer dette blir mykje bør du vurdere å gå for Chromebooks der Google tek seg av tryggleiken. Med tida kjem Microsoft med Windows 10 S. Bokstaven S står for Security, ikkje Skrapa som onde tunger vil ha det til. All programvare som skal installerast må kome frå Microsoft-butikken.

Vi har vi levd med Microsoft, DOS, Windows, Office og lokal lagring av filer i titals av år. Kanskje bør vi gi opp dette? Det er altfor lett å lura folk til å installere og/eller køyre skadevare som kan kryptere filene på PCen og diskane PCen har tilgang til. Er du maksimalt uheldig ryk filene på PCen din og alle kopiar som ligg på nettverks- eller USB-disken din. Er du kopla til Dropbox eller andre synkroniseringstenester, sprer dei øydelagde filene seg til dei andre PCane dine.

Google bygger sine tenester i skya og tek ikkje vare på gamal arv; filformat og organisering vi er van med. Alt ein treng er ein Chromebook med eit nedstrippa og sikkert operativsystem. Du kan òg jobbe mot filene frå ein PC. Om du installerer Google Drive blir små filer med peikar eller snarveg til fila lagt ned. Microsoft sin konkurrent Office Online og OneDrive opprettar fullverdige Office-filer. Blir dei øydelagde på PCen, vert filene synkroniserte opp i skya med katastofalt resultat.

Eg lurte på om eg kunne øydelegge snarvegsfilene til Google Docs og Sheet som er synkronisert ned til PCen. Til testen brukte eg GnuPG for å kryptere snarvegane til binære eller ascii-koda krypterte filer. Ville ei øydelagd snarvegsfil medføre at eg mister dokumentet eller reknearket i skya?

Svaret er at eg greidde ikkje å øydelegga sky-versjonen. Snarvegsfilene eg øydelagde ville ikkje synkroniseringsprogrammet Google Drive synkronisere opp i skya. Klikka eg på desse snarvegsfilene frå Windows utforsker, fekk eg grei beskjed om «Invalid» fil. Ute i skya fungerte alt som om ingen ting hadde skjedd.

Etter å ha flytta på router fekk maskina til ei av jentene problem. Sidan dei går på same skule med same utstyr, var det svært merkeleg at den eine maskina hadde sterkt signal på same staden som den andre miste signalet.

Maskinene har eit Intel AC-3160-kort internt. I utgangspunktet eit rimeleg kurrant kort. Eg opna service-luka og sjekka at antennekablane sat fast (1 og 2 på bilete). I første omgang tenkte eg at det kunne vere brot ein eller anna stad på antennekabelen som strekker seg frå under maskina opp og rundt skjermen. Litt seinare på kvelden søkte eg på nettet og kom over eit innlegg på eit forum der ein kar med ei maskin frå Toshiba med same kortet hadde same problemet. Han hadde sendt maskina på service og det viste seg at nettverkskortet var problemet.

Tidlegare i vinter kjøpte eg eit Intel AC-7260-kort for å få samla sum på ein handel over fraktfritt beløp. Planen var å skifte ut kortet i ei anna maskin. Dessverre «likte ikkje» maskina kortet så det har vorte liggande.

No har maskinene som er kjøpt etter avtale med fylkeskommunen 3 års garanti, men då må maskina sendast til Bergen for service. Utan eit sentralt arbeidsverktøy i skulekvardagen i eit par til tre vekers tid seier det seg sjølv at terskelen er høg for å sende inn. No skal eg ikkje dra ein lang diskusjon om kor servicevenleg det er. I første omgang såg eg for meg ekstra små nettverkskort som kan stå i USB-porten. Desse vil stikke ut ørlite og er ein uheldig kan ein skade hovudkortet til maskina om uhellet er ute.

Sidan eg er nevenyttig med datamaskiner, bestemte eg meg for å utføre servicen sjølv og setje inn det kraftigare Intel AC-7260-kortet eg hadde liggande. Det er ikkje vanskeleg og for dei som ikkje er van er det komplett rettleiing på Youtube. Det viktigast er å koble frå straum og ta vekk batteriet. Når alle straumkilder er borte, trykk du eit par gonger på startknappen for å tappe restenergi i kretsane før du byrjar.

Du lausnar to skruer på serviceluka, skyv ho fram ca 1/2 cm og løfter ho bort. No er det berre å løfte/kople antennekablane frå nettverkskortet, skru ut to skruer det er festa med og ta ut kortet. For å setje inn nytt kort er det berre å følge motsett rekkefølgje.

Når maskina var sett i hop at, starta eg ho og Windows oppdaga det nye kortet og installerte nødvendige drivarar. Signalkvalitet va no mykje betre. På staden der maskina med deg gamle kortet ikkje kunne sjå nettverket i huset, hadde det nye kortet svært godt signal. I tillegg såg det mange nettverk i nabolaget som det gamle kortet ikkje hadde ensa i det heile.

Eg leiger av og til filmar ulike stadar og har irritert meg over at spesielt filmar spelt av på PC i iTunes har hakka. Du legg merke til det lett og det er spesielt merkbart ved panorering. Det flyt ikkje jamnt, men hakkar. Eg kan heller ikkje sjå vesentleg forskjell om eg køyrer versjonar i 720p eller 1080p.

Eg har lenge trudd at det var maskina som kom litt til  kort med ein Intel Pentium B940. iTunes har vore absolutt verst. NRK, Youtube best og Google Play nest best. Ei tid før jul kjøpte eg med ei ny mediamaskin som var noko kraftigare. I tillegg har grafikkdelen av prosessoren støtte for dekoding av (nokre) videoformat.

Eg har kjøpt nokre filmar på iTunes. Desse er lasta ned på maskina slik at problema ikkje kan tilstrivast dårleg nettline. Sette meg til for å sjå filmane, men eg la merke til at hakkinga ikkje hadde vorte nokre betre, trass i betre maskin. Eg søkte litt rundt og såg at fleire hadde problem utan at tips til ulike løysingar såg ut til å løyse det for meg.

• Eit eksempel på tilsvarande problem frå Reddit
• Ein eksempel frå Apple sitt forum

Begge har betre prosessorar enn dei nemnt over samt den siste har sett inn eit splitter nytt grafikkort som i teorien skulle vere til god hjelp.

Både balansert plan for straumstyring og full ytelse har eg prøvd. Flatskjermen er innstilt på 60 hz som skal ta betre omsyn til video på 30 bilete pr sekund eller ekte 24 bilete pr sekund (ikkje 25 som i Europa). Har testa både 50 og 60 hz på TVen, men hakkinga i bilete er der uansett.

Til slutt drog eg fram den «største kanona», Intel Core i7-2630QM, men ikkje pokker om ein prosessor med 4 kjernar samt hyper threading, som gir programvaren totalt 8 kjernar å leike seg med, løyste noko. Felles for det nye mediasenteret og «kanona» er at prosessorbruken ligg lågt og ingen av dei «bryt sveitten» ved avspeling av fillmane. I teorien skulle det flyta fint, men det gjer det ikkje. Får sjå om eg greier å finne løysinga, men har vel lite håp om det.

Råd: Inntil vidare styr klar av iTunes-filmar om du sit på ein PC med Windows.

Fy flate som eg har slite med TVen sidan januar, etter eg kjøpte Chromecast 2. Han har stått i ein av dei 3 HDMI-portane på baksida av TVen, der også antenne og ein ekstern disk via USB er plugga til. Straum til Chromecast 2 vart henta frå USB på venstre sida. Funksjonaliteten som  Chromecast 2 tilbyr har fungert glimrande, men han har skapt mykje f**nskap for TVen.

Mottak av TV over RiksTV har vore dårleg. Opptak til hard disk etter programmering via programguiden til TVen har vore meir unntak enn regelen. Det byrja å dukke opp meldingar om media disk plugga på sida av TVen. Eg har skifta fleire antennar og bytt antennekablar. Eg har bytt om på harddiskar både med eller utan ekstern straumforsyning. Likevel har eg stått igjen som eit levande spørsmålteikn.

Tidligare i sommar fjerna eg Chromecast 2, men etter ei tid valde eg å setje han til teneste igjen. Nettbrettet og Chromecast 2 var så mykje enklare å forhalde seg  til enn PCen eg har kopla til TVen. Utan å ha tenkt over det var problema med TVen mykje mindre i perioden Chromecast 2 låg i skuffa. Etter at Chromecast 2 var på plass igjen dukka dei gamle problema opp att. Nok ein gong vart det ein runde med bytting om på antennar osv. Eg mistenkte lamper og utstyr i rommet eller naborommet kunne forstyrre, men eg greidde aldri å finne eit mønster der eg kunne peike ut ein syndar.

Etterkvart byrja det å gå opp eit lys for meg. Chromecast 2 har ein magnet i HDMI-delen. Det er magneten som gjer at du kan brette og feste kabelstykke på baksida av «pucken», sjå på bilete. Chromecast 2 vart fjerna frå TVen og eg la merke til at mottak av TV-signal vart mykje betre. No har ikkje Chromecast 2 vore kopla til TVen på 14 dagar og problem med mottak er borte. Ja, det kan vere ein feil av og til, men i forhold til før er problemet borte. Eg testa opptak natt til i dag etter TVen sin programguide og det fungerte på første forsøk. Begge filmane ligg på disken min og eg gler meg til å sjå gamlekarane i Grudge Match.

Mitt råd: Hald Chromecast 2 langt unna TVen! Prøv å setje han på ein forlengingskabel, aldri rett i TVen!!