I siste oppdateringa av Windows 10, har Microsoft fått på plass «kontrollert mappetilgang» i Windows Defender. Formålet er å beskytte dine data (dokument, bilder, musikk osv.) mot skadevare som krypterer dine filer om du er uheldig og klikkar på vedlegg i e-post som inneheld slikt. Det er fleire ting ein må vere obs på.

For det første er ikkje kontrollert mappetilgang aktivert som standard i Windows 10. Du må aktivere det via Windows Defender Sikkerhetssenter -> Virus og trusselbeskyttelse -> Innstillinger for virus- og trusselbeskyttelse -> Kontrollert mappetilgang -> På

For det andre skal Microsoft ha oversikt over «snill» programvare, men har ikkje full oversikt. Kanskje det er for tidleg. På min PC kjente ikkje kontrollert mappetilgang til:

• LibreOffice 5.3.7
• WebSite Watcher 17.2
• GnuPG 1.4.21
• IrfanView 4.44 *

Windows Defender protesterte ikkje på IrfanView på laurdag. Dagen etter (søndag), når eg skriv innlegget og skulle gjere klar nokre ekstra bilete, var IrfanView ikkje OK lenger. Vonar det er ein «barnesjukdom». Det er synd om kontrollert mappetilgang ikkje blir til å lite på.

Du bør aktivere kontrollert mappetilgang, men for dei som spelar er det lurt å sjekke om alle spela som lagrar til dei beskytta områda blir godkjent. Det er synd å tape god framgang i eit spel fordi det ikkje blir godkjent. Windows Defender endrar ikkje statusen til spelet om du legger spelet til som godkjent app, medan det køyrer.