Eg har sett på alternative måtar å sikra filer i skya med individuell filkryptering. Tidlegare har eg brukt encfs4win, men sidan den baserer seg på komponentar som ikkje har vorte oppdatert på ei god stund, fann eg fram til EncFS MP. Denne programvara er òg enklare å setje opp og bruke.

På PCen i mappa OneDrive laga EncFS MP ein djup mappestruktur takka vere kryptering av filnamn og katalogar (samt innhaldet). At det vert slik klagar ikkje pcen på. Problemet oppstår når mappestrukturen skal synkroniserast mot OneDrive. Bilete over er henta frå OneDrive-klienten til Windows 7 og viser OneDrive klagar over at stien/banen til fila er for lang. Uansett kva du gjer så avsluttar OneDrive-klienten for Windows 7, men ikkje klikk på OK! Avbryt og rett opp filnamn og sti/bane på pcen før du startar OneDrive igjen.

I Windows 8.1 la eg berre merke eit utropsteikn på OneDrive-symbolet og las i synkroniseringmeldingane at same fil ikkje kunne synkroniserast pga for lang sti/banke. Eg trur ikkje OneDrive avslutta, men eg sleit litt med å få i gang att synkroniseringa etter at eg hadde fjerna mappestrukturen som skapte problem. Eg er usikker på om feilen ligg i klienten eller OneDrive i skya. Sidan klienten i Windows 7 takka for seg, kan det tyde på at det er lokalt i klienten. Eg har testa den same strukturen i GoogleDrive og her fungerer synkroniseringa utan eit einaste problem.