Heilt sidan eg kopla meg til internett på slutten av 1995 har ei av dei store utfordringane å overføre informasjon i meldingsformat vore ei utfordring. E-post var aldri designa for sikker meldingsutveksling. Eg fatta interesse for Phil Zimmermann si løysing Pretty Good Privacy.

Løysinga baserer på kryptografi med offentleg og privat nøkkel. Din offentlege nøkkel kan du fritt distribuere rundt til alle. Med den og nødvendig programvare kan dei kryptere informasjon og sende den til deg utan at nokon kan opne den opp. Din private nøkkel tek du vare på sjølv og deler ikkje med andre. Den private nøkkelen er den som låser opp meldingar/informasjon som andre har kryptert med din offentlege nøkkel. Om de vil vite korleis PGP virkar kan de lese her.

I byrjinga var det mykje knoting med dos-kommandoar for å få dette til. Det seier seg sjølv at det vart for spesielt interesserte. Seinare kom det versjonar for Windows, men det tok aldri av. Phil selde løysinga og fleire selskap har forsøkt å få det til. No er det Symantec som eig PGP. Over tid har PGP endra seg til å vere ei fullverdig løysing for datatryggleik retta på verksemder, men det fins andre og mindre løysingar som kan sikre dine meldingar på akkurat same måten som PGP.

Ein av dei nyaste løysingane som har dukka opp er Mailvelope. Dette er ein plugin eller tillegg for nettlesarane Chrome eller Firefox.  Ho blir levert ferdig oppsett for populære e-posttenester som Gmail, GMX, Outlook.com og Yahoo!® Mail. Under Documentation får du all hjelp får du all hjelp som trengs til å lag ditt nøkkelpar, eksportere din offentlege nøkkel, importe andre sine offentlege nøklar osv. Du kan i tillegg legge til støtte for andre tenester som tilbyr e-post på nettet. Har vennene dine generert sine nøkkelpar og sendt deg sine offentlege nøklar, kan du sende sikkert meldingar til dei. Ingen andre enn mottakarane kan lese meldinga.

No må de ikkje sende alt kryptert sidan det har si bakside. Du vil ikkje ha moglegheit til å bruke søkefunksjonen til Gmail, Outlook.com osv.

Ei anna ulempe med Mailvelope er at det kun er teksten i meldinga som vert kryptert, vedlegget vil gå ukryptert. Om du vil kryptere vedlegget må du sjå etter løysingar som GPG4Win eller GPG2go eller GPG4u. Du må eksportere den offentlege nøkkelen til den/dei du vil sende til frå Mailvelope og importere den i dei nemnde løysingane, kryptere fila som skal vedleggast og deretter legge ho ved e-posten.

 

For ei tid tilbake hadde Lefdal eit svært godt tilbod på ein Acer Aspire E1-572. Det sentrale for meg var at eg fekk ei maskin med full HD-oppløysing på ein 15,6” skjerm til ein særs god pris. Maskina var lett og hadde bra batterilevetid. Prosesseringkraft var det nok av for mitt bruk. Disken vart i løpet av kort tid skifta ut med SSD og det var ein lynkjapp, stille og rask nok arbeidsstasjon.

Maskina kom med Windows 8, som etter oppgradering vart til Windows 8.1. Eg lasta ned dei siste drivarane for Windows 8.1 frå Acer og installerte alt. Det meste fungerte som det skulle, men eg la merke til at det var noko merkeleg over tid med toucpaden etter oppgraderinga.

Om eg ikkje hugsar feil så var det eit problem dersom eg hadde hatt tilkopla ei USB-mus. Når eg drog ut denne kunne det hende at drivaren til touchpaden slutta å virke eller eg kunne oppleve at instillingane var nullstilt. Det var lettast å merke på rulling som etter mange år dei har valt å gjere motsett i Windows 8.x. Eit anna problem var at brått kunne venstre musetastklikket låse seg fast slik at eg ikkje fekk frigjort eit vindauga som eg flytta. Like irriterande var det å merke tekst og så registrerer systemet framleis at eg held musetasten uten at eg fysisk gjer det. Ei løysing var å setje maskina i kvilemodus, men det var ikkje ei god løysing.

Løysing
Eg visste at problema ikkje eksisterte når maskina køyrde Windows 8. Eg lasta ned ein eldre versjon av drivaren for Windows 8 og installerte den i Windows 8.1 No fungerer touchpaden heilt fint. Det er/var tydeleg eit eller anna problem med den offisielle Windows 8.1-versjone av drivaren.

Eg viser til innlegget 10 månadar med Android. For nokre dagar sidan gjekk systempartisjonen til S2 så full at oppdatering av appar byrja å svikte, 3 månadar sidan sist. Eg byrja å skjøne det i desember og har sidan forsøkt å spare på lagringsplassen. Fleire gongar har eg sjekka opp dei få appane eg nyttar, tømt lager og flytta det som kan flyttast til SD-kortet. Men det har hatt same effekt som å pisse når ein ligg i kald sjø.

Sidan ingen av forventa brukarhandlingar har fungert, har eg levd i den tru at problemet skuldast at Android ikkje ryddar opp filer til systemet. Løysinga på dette måtte være å låse opp («root») Android slik at ein kan gå inn i filsystemet og slette filene. Slikt kan ha sine uheldige konsekvensar sidan ein fjernar/svekkar basisforsvaret i Android som gjer telefonen meir sårbar for tvilsom kode. I mine auge var telefonen defekt. Ein kan ikkje setje seg ned 4 gonger i året og nullstille telefonen og setje han opp att.

Etter at telefonen vart skifta ut gjorde eg søk på nettet og det viser seg at problemet er kjent og stammar frå oppdateringa til Android 4.1.2 som, om eg hugsar rett, kom i fjor sommar. Her er nokre lenker som omtalar det:

• http://community.vodafone.com.au/t5/Android/Device-storage-issue-After-updating-SGalaxy-S2-to-4-1-2-Please/td-p/200516
• http://forums.androidcentral.com/samsung-galaxy-s-ii/272384-galaxy-s2-cannot-download-updates-new-apps.html

Problemet kjem av at loggar og crashdumpar som ikkje blir rydda opp. Ei mogleg løysing blir skissert som ikkje krev at ein låser opp Android. Eg har diverre ikkje fått testa ho, men ho kan vere verd eit forsøk:

1. «Ring» *#9900#
2. Velg  “Delete dumpstate/logcat” i menyen

Menyen er tilgjengeleg i nyare S-versjonar. Har du tilsvarande problem er det forsøket verd. Å nullstile telefonen for å setje han opp att frå grunn av er arbeidskrevjande og mildt sagt irriterande. Eg er særdeles skuffa over Samsung sidan dei ikkje har greidd å rette problemet. Ei oppdatering burde vore på plass for lenge sidan.

Samsung, dette er kvalitetsmessig langt under pari!

Eg er ikkje framand med online kjøp av spel. Som gamal Half Life-fan fekk eg med meg opninga av Valve sin nettbutikk  Steam. Mine erfaringar herifrå har vore heilt framifrå sidan eg registrerte installasjonsnøklane frå min Half Life Generation pack og fekk spela tilgjengeleg elektronisk, ferdig oppdatert til ei kvar tid.

Over tid har Steam fått eit stort og variert utval som no også inkluderer anna programvare enn spel. Det er ofte mange gode tilbod og eg har kjøpt nokre gamle klassikarar for nokre få 10-arar. Problemet har vore å få tid til å spele ser eg. Det har vorte heilt andre prioriteringar for min del.

Electronic Arts har dei siste åra prøvd seg med nettbutikk. I forhold til Steam er dei på barnehagestadiet, som eg vil utdjupe nærare.

1. Katalog

Katalogen over spel er begrensa til for det meste titlar frå Electronic Arts.

2. Prisar

I motsetning til Steam, som ofte køyrer tilbod på spel og programvare, har Electronic Arts valt å halde ein høgt prisnivå. I starten såg ein omtrent ikkje tilbod. Det var rimelegare å vitje CDon eller ein anna nettbutikk å kjøpe spelet til halv pris. Utover i 2013 har det betra seg litt. Eg har kjøpt eit par spel som Burnout Paradise og Need for Speed Most Wanted til svært gode rabattar. Eg trur det første kosta nokre 10-arar. Det siste kosta 130 rundt juletider 2012. Samalikna med ordinær listepris var det ca 75% rabatt. Eg sparte mykje og ungane fekk mykje moro.

Høge prisar kan ha si forklaring med at Electronic Arts tradisjonelt har distribuert via detaljistleddet CD/DVD/BluRay. Blir Electronic Arts for billige på nettet, vil dei undergrave detaljistkanalen. Denne arven er belastande for kundane så vel som Electronic Arts.

3. Implementasjon

Ungane mine har vore voldsomt fasinerte over The Sims. The Sims 3 med ulike tilleggspakkar er kjøpt på DVD/CD. I full forståingmed at eg ikkje seinare kan selje desse, har eg lagt installasjonsnøklane inn i Origin/Electronic Arts slik at eg kan ha spela tilgjengelege der.

Det har i ei tid vore ønskje om eit par pakkar til The Sims 3. Denne helga var det sal hjå Origin og eg valde å kjøpe nokre pakkar for å overraska ungane når dei kjem tilbake frå haustferien. Tinging og betaling på nettet gjekk greit. Eg mottok ordrebekreftelse med nokre tilleggkodar som løyser ut nokre småting som eit og anna kostyme. Alt såg bra ut.

Maskinene hadde CD/DVD-versjonen installert frå tidlegare så eg valde å avinstallere for å installere alt på nytt via Origin og det er her eg bit meg merke til ting som ikkje bør vere som dei no er:

Uoppdatert Sims 3

Det er heilt utruleg, men installerer du The Sims 3 frå Origin må du først laste ned 3 – 4 GB med installasjonsfiler som er den versjonen som vart utgitt i 2009. Med ein gong du vil spele får du beskjed om at denne må oppdaterast og ytterlegare 1,3 GB med oppateringar må ned. Her distribuerar ein digitalt og så greier ein ikkje sjå til at hovudinstallasjonen til ei kvar tid innheld oppdaterte filer! Dette syner at Electronic Arts er amatørar innan digital distribusjon.

Installasjonsnøklar?!!!

Etter at eg betalte for dei 3 tilleggspakkane, spratt dei på plass i Origin. Stor var overraskinga eg vart bedt om installasjonsnøkkel når installasjonen starta etter nedlasting i klienten til Orgin. Eg datt nesten av stolen. Kvifor treng eg installasjonsnøklar når eg må vere pålogga min eigen konto hjå Origin for å få tilgang til spelet. Eg kan godt forstå installasjonsnøklar ved kjøp av CD/DVD, men ikkje på digital distribusjon direkte frå utgivar!!!!

Eg leitte gjennom ordrestadfestinga, var innom kontoen min på Origin, Electronic Arts og nettstaden for The Sims 3 for å leite etter dei. Ingen stadar var dei å finne. Eg venta til kvelden utan å motta faktura eller nøklar frå Electronic Arts/Origin. Eg tok kontakt via chat og fekk der levert ut installasjonsnøklane. Eg vart forklart at det var problem med, slik eg forstod det, utsending av installasjonsnøklar denne dagen. Nok ein gong vil eg påpeike at Electronic Arts er amatørar innan digital distribusjon.

Lager for installasjonsfiler i Origin-klienten

I håp om å spare meg 2 x 10 til 15 GB med nedlastingar på ei 3 Mb line hadde eg justert Origin-klienten før eg starta installasjonsløpet på maskin 1 slik at installasjonsfiler skulle ende opp i ein lett tilgjengeleg mappe samt at eg bad om at installasjonsfilene ikkje skulle slettast etter installasjon. Tanken var å flytte innhaldet til maskin nummer 2 og 3 for installasjon. Til mi store overrasking er mappa tom på maskin 1. Eg har stoppa og starta klienten på maskin nummer 2 for å sjå om det kunne vere problemet.  Heller ikkje på maskin nummer 2 ligg installasjonsfilene der eg har oppgitt at klienten skal legge dei. Nok ein gong: Amatørar!