10 månadar med Android

26. oktober 201313. februar 2022 Arild BjørkKommenter innlegget

I januar gjekk eg over frå Nokia N8 med Symbian Belle til Samsung S2 med Android 4.0.4 og seinare 4.1.2. Før du les vidare skal eg gjere deg merksam på at mine erfaringar med Samsung S2 og/eller Android er på ingen måte fordelaktige. Det har vore sagt og skrive mykje i forhold til Nokia og Symbian, men eg har ikkje noko å utsetja på det. Symbian gjorde jobben sin utan «dikkedariar».

Batteritid

Eg skal vere like kort. Batteritida er dårleg. Sjølv med mininal bruk må du lade kvar dag.

Android

Eg og for den del andre har opplevd eit par problem med telefonen og/eller Android som i det minste er kjedelege, men for meg er i klassen med «show-stoppers».

Kryptering av telefon

Telefonane no til dags er meir enn eit verktøy å ringe med. Dei skal krypterast slik at data ikkje kjem uvedkomande i hende om du misser han. Første gong eg krypterte telefonen såg alt ut til å gå som planlagt, men når han var ferdig hevda Android at han hadde vorte avbroten og måtte nullstillast. Heldigvis hadde eg teke sikkerheitskopi, men det tek alltid ei tid å få sett opp at telefonen slik ein vil ha han.

Aktivering av kryptering på ein anna Samsung S2 medførte ikkje den same meldinga, men telefonen måtte nullstillast til eigaren sin irritasjon då krypteringa hang seg opp.

Datapartisjon fylles sakte, men sikkert opp

Eg er på ingen måte ein aktive brukar av applikasjonar. Eg har ikkje spel, berre nokre få, nødvendige applikasjonar av eige val installert. Telefonen har ein partisjon til applikasjonar og data til desse. Nokre applikasjonar kan ein flytte over på SD-kortet, men det er heller få. Sakte men sikkert fekk telefonen i løpet av 6-7 månadar fyllt opp applikasjon- og datapartisjonen. Det var att mellom 100 og 200 MB som førte til at eg ikkje fekk oppdatert applikasjonar og telefonen klaga over at han hadde lågt med minne.

Problemet har andre opplevd mykje meir enn meg, med gjentekne nullstillingar av telefon som følgje. Eg har sett dette problemet på ein anna fabrikant sin telefon og anna modell av Samsung med eldre versjonar for Android. For meg tyder det på at eit eller anna med Android må vere riv ruskande gale når det ikkje greier å rydde opp etter seg. Ein skulle trudd at dette var på plass i versjon 4.1.2, men den gang ei!

Google Play Music applikasjon

Eg har ein del musikk på telefonen. For spelelister generert frå PC i t.d. m3u-format er det ikkje problem. Problemet er spelelistene eg lagar med applikasjonen. Ved ein restart av telefonen blir alle desse tømde. Spelelista er der, men ho innehald ikkje spor. Det verste med det er at det ikkje er noko nytt problem. Søk på Google etter google play music playlists empty eller google play music playlists disappear.

Konklusjon

Eg er i sterke tvil om min neste telefon blir basert på Android. På meg virkar Android som eit system som ikkje er mogent nok. Det er altfor mange lus og store fundamentale problem som fører til at ein utan dei rette forholdsreglane kan ende opp med store tap av data og bortkasta tid med å setje opp att telefonen.

Tur: Lauparfjellet

13. oktober 201313. februar 2022 Arild BjørkKommenter innlegget

Lauparfjellet Namnet gir inntrykk av at ein må høgt til fjells, men dette ein bonus til turen til Hamrestølen framom Høgehaug. Etter at du har kome ut frå skogen og byrja på skogsvegen, kan du etter eit par 100 meter ta ein avstikkar ned til utsiktspunktet. Det heng eit skilt med svak raud skrift som indikerer starten på stien. Det er ikkje meir enn 100 meter å gå før du klatrar over eit gjerde og kjem ut på ei hylle over Hanahaug med utsikt over Leikanger og Sognefjorden.

Om du har valt å gå frå Eggja er det berre å halde fram turen på skogsvegen. Hamrestølen er omtrent halvveges til utsiktspunktet Lauparfjellet.

Tur: Hamrestølen frå Eggja

13. oktober 201313. februar 2022 Arild BjørkKommenter innlegget

Hamrestølen er ein liten støl med 1 sel og eit par løer. Stølen ligg på ca 400 moh, rett over Hamre. Kortaste fotturen dit tek du frå Eggja. Han er på mellom 700 – 800 meter slik at du knapt kan rekne med å bli sveitt. I så måte er det ein ypperleg tur å ta med seg små ungar på.

For å kome til Eggja må du køyre forbi Hamre og fruktlageret i retning Hella. Etter 400-500 meter tek du av frå Sognefjordsvegen og startar klatringa opp mot Eggja. Vegen slynger seg oppover bak Fosshagen og er til tider smal. Ver budd på å rygge, her er det sjeldan plass til to køyretøy. Du skal nesten heilt til endes på Eggja. Ca 100 meter før bilvegen endar, startar skogsvegen som går opp til Hamrestølen.

Etter ca 2/3 av turen etter skogsvegen kjem du til ei grind som markerer starten på eit granfelt. Legg merke til orkanen Dagmar sine herjingar i området. Ute i terrenget rundt skogsvegen ligg mykje gran flat. Like etter Dagmar, for snart eit par år sidan, var skogsvegen uframkommeleg. Området likna meir på pinnespelet der ein slepp pinnar og skal plukke dei opp ein og ein utan at dei andre pinnane rører seg. Det var ei utfordring og passere og til tider ikkje heilt trygt sidan ein ikkje kunne vere viss på kva for spenn som var att i trea. Herjingane her var etter mi vurdering verre enn på stien til Skoparsete frå Skjer.

Tur: Kleppa til Hamrestølen framom Høgehaug

13. oktober 201313. februar 2022 Arild BjørkKommenter innlegget

Hamrestølen er ein liten støl med 1 sel og eit par løer. Stølen ligg på ca 400 moh, rett over Hamre. Det blir omtrent på same høgda som Kleppa. Det er kortare å gå til Hamrestølen frå Eggja, men frå Kleppa kan du variere turen.

Haugen som ligg vest for Kleppaområdet heiter Høgehaug. Kleppa ligg på austsida og Hamrestølen ligg på vestsida av Høgehaug. Du kan velje å gå framom Høgehaug, bak Høgehaug eller over Høgehaug. Her blir turen framom Høgehaug skildra og han er ca 2,5 km lang. Det er same lengda som turen bak Høgehaug frå Kleppa. Ein rundtur rundt Høgehaug blir då på 5 km.

Frå Kleppa følgjer du traktorvegen til du kjem til Husabøstølen. Der skal du ta til venstre opp gjennom skogen. I enden vil du sjå eit skilt som pekar til Eggja. Du passerer eit gamalt sel og vil like etter gå inn i granskogen på framsida av Høgehaug. Mykje av stien går langs gjerdet som går over Frækaland. Trea står tett, men du kan skimte litt fjord og terreng gjennom dei. Dagmar har velta ein del tre.

Omtrent halvdelen av turen går i skogen, før du kjem ut på ein skogsveg som kjem frå Hamrestølen og Eggja. Har du tid vil du etter nokre 100 meter på skogsvegen kunne ta ein avstikkar ned til eit utsiktspunkt kalla Lauparfjellet. Skiltet er litt utydeleg. Det er ein kort avstikkar på ca 100 meter som tek deg til eit luftig utsiktpunkt rett bak og over Hanahaug.

Vil du ikkje sjå på utsikten er det berre å følgje skogsvegen til du kjem ut på Hamrestølen.

Tur: Kleppa til Hamrestølen bak Høgehaug

13. oktober 201313. februar 2022 Arild BjørkKommenter innlegget

Frå Kleppa følgjer du traktorvegen i nesten 1 km til der han gjer ein krapp sving og du har tre retningar å gå i. Mot sør kan du gå opp på Høgehaug. Mot nord svingar vegen tilbake mot Øvstestølen. Om du held fram vestover eller rett fram i svingen, kjem du inn på stien som går i retning Hamrestølen. På vegen dit passerer du i skogen over Vålamyri.

Frå du forlet skogsvegen i svingen, går du inn i myrområde. Til Vålamyri er det like over 900 meter og halvparten av stien går gjennom fuktig myr og gras. Når du kjem til granskogen, vil du etter eit kort stykke kome til tydeleg skilting som peikar deg ned mot leirplassen ved Vålamyri. Frå dette skiltet og til Hamrestølen er det att ca 800 meter som hovudsakleg går gjennom tett granskog. Tre er med ujamne mellomrom merka, men det er ikkje vanskeleg å sjå kor stien går. Når du nærmar deg Hamrestølen, vil du sjå at orkanen Dagmar har sett sine spor. Store mengder med tre er velta og stien har vorte rydda. Ca 50 meter frå sælet og løa der ein finn turposten, kjem ein ut av skogen og inn på traktorvegen som går på framsida inn til under Høgehaug.

Tur: Kleppa til Vålamyri

12. oktober 201313. februar 2022 Arild BjørkKommenter innlegget

Vålamyr er eit lite vatn eller kanskje rettare sagt eit tjern som ligg bak Høgehaug. Frå Kleppa følgjer du traktorvegen i nesten 1 km til der han gjer ein krapp sving og du har tre retningar å gå i. Mot sør går du opp til Høgehaug. Mot nord svingar vegen tilbake mot Øvstestølen. Om du held fram vestover eller rett fram i svingen, kjem du inn på stien som går i retning Hamrestølen. På vegen dit passerer du i skogen over Vålamyri.

Nede på Vålamyri finn du benker sett opp og bålplass. Det kan hende at det er spent opp ein gapahuk under trea. Pass på når du nærmar deg vatnet eller tjernet. Prøv å gå på tuer og hald eit auga med kor du set foten. Å gå to kilometer tilbake til Kleppa i suppande blaute sko er vel ikkje fristande?

Tur: Kleppa til Høgehaug

12. oktober 201313. februar 2022 Arild BjørkKommenter innlegget

Høgehaug ligg over Husabø på Leikanger. Turen frå Kleppa til Høgehaug er like i underkant av 1,4 km og går på traktorvegen opp til svingen der ein kan velje å svinge opp mot Øvstestølen eller gå rett fram i retning av Vålamyri/Hamrestølen eller til venstre opp til Høgehaug. Du stig i underkant av 200 høgdemeter frå parkeringsplassen på Kleppa. Eg vil tru alle kan greie denne turen.

Sidan Høgehaug er eit utsiktspunkt kan det vere like greitt å gå opp her, nyte utsikta og gå ned på andre side i retning Hamrestølen. Då slepp du å gå i myrane bak Høgehaug eller i skogen under Høgehaug til eller frå Hamrestølen. Ingen av desse turane gir det det beste av utsikt. Investeringa i dei ekstra høgdemeterane det er å gå over Høgehaug er vel verd det.

Erfaringar med Origin

12. oktober 201311. oktober 2020 Arild BjørkÉin kommentar

Eg er ikkje framand med online kjøp av spel. Som gamal Half Life-fan fekk eg med meg opninga av Valve sin nettbutikk Steam. Mine erfaringar herifrå har vore heilt framifrå sidan eg registrerte installasjonsnøklane frå min Half Life Generation pack og fekk spela tilgjengeleg elektronisk, ferdig oppdatert til ei kvar tid.

Over tid har Steam fått eit stort og variert utval som no også inkluderer anna programvare enn spel. Det er ofte mange gode tilbod og eg har kjøpt nokre gamle klassikarar for nokre få 10-arar. Problemet har vore å få tid til å spele ser eg. Det har vorte heilt andre prioriteringar for min del.

Electronic Arts har dei siste åra prøvd seg med nettbutikk. I forhold til Steam er dei på barnehagestadiet, som eg vil utdjupe nærare.

1. Katalog

Katalogen over spel er begrensa til for det meste titlar frå Electronic Arts.

2. Prisar

I motsetning til Steam, som ofte køyrer tilbod på spel og programvare, har Electronic Arts valt å halde ein høgt prisnivå. I starten såg ein omtrent ikkje tilbod. Det var rimelegare å vitje CDon eller ein anna nettbutikk å kjøpe spelet til halv pris. Utover i 2013 har det betra seg litt. Eg har kjøpt eit par spel som Burnout Paradise og Need for Speed Most Wanted til svært gode rabattar. Eg trur det første kosta nokre 10-arar. Det siste kosta 130 rundt juletider 2012. Samalikna med ordinær listepris var det ca 75% rabatt. Eg sparte mykje og ungane fekk mykje moro.

Høge prisar kan ha si forklaring med at Electronic Arts tradisjonelt har distribuert via detaljistleddet CD/DVD/BluRay. Blir Electronic Arts for billige på nettet, vil dei undergrave detaljistkanalen. Denne arven er belastande for kundane så vel som Electronic Arts.

3. Implementasjon

Ungane mine har vore voldsomt fasinerte over The Sims. The Sims 3 med ulike tilleggspakkar er kjøpt på DVD/CD. I full forståingmed at eg ikkje seinare kan selje desse, har eg lagt installasjonsnøklane inn i Origin/Electronic Arts slik at eg kan ha spela tilgjengelege der.

Det har i ei tid vore ønskje om eit par pakkar til The Sims 3. Denne helga var det sal hjå Origin og eg valde å kjøpe nokre pakkar for å overraska ungane når dei kjem tilbake frå haustferien. Tinging og betaling på nettet gjekk greit. Eg mottok ordrebekreftelse med nokre tilleggkodar som løyser ut nokre småting som eit og anna kostyme. Alt såg bra ut.

Maskinene hadde CD/DVD-versjonen installert frå tidlegare så eg valde å avinstallere for å installere alt på nytt via Origin og det er her eg bit meg merke til ting som ikkje bør vere som dei no er:

Uoppdatert Sims 3

Det er heilt utruleg, men installerer du The Sims 3 frå Origin må du først laste ned 3 – 4 GB med installasjonsfiler som er den versjonen som vart utgitt i 2009. Med ein gong du vil spele får du beskjed om at denne må oppdaterast og ytterlegare 1,3 GB med oppateringar må ned. Her distribuerar ein digitalt og så greier ein ikkje sjå til at hovudinstallasjonen til ei kvar tid innheld oppdaterte filer! Dette syner at Electronic Arts er amatørar innan digital distribusjon.

Installasjonsnøklar?!!!

Etter at eg betalte for dei 3 tilleggspakkane, spratt dei på plass i Origin. Stor var overraskinga eg vart bedt om installasjonsnøkkel når installasjonen starta etter nedlasting i klienten til Orgin. Eg datt nesten av stolen. Kvifor treng eg installasjonsnøklar når eg må vere pålogga min eigen konto hjå Origin for å få tilgang til spelet. Eg kan godt forstå installasjonsnøklar ved kjøp av CD/DVD, men ikkje på digital distribusjon direkte frå utgivar!!!!

Eg leitte gjennom ordrestadfestinga, var innom kontoen min på Origin, Electronic Arts og nettstaden for The Sims 3 for å leite etter dei. Ingen stadar var dei å finne. Eg venta til kvelden utan å motta faktura eller nøklar frå Electronic Arts/Origin. Eg tok kontakt via chat og fekk der levert ut installasjonsnøklane. Eg vart forklart at det var problem med, slik eg forstod det, utsending av installasjonsnøklar denne dagen. Nok ein gong vil eg påpeike at Electronic Arts er amatørar innan digital distribusjon.

Lager for installasjonsfiler i Origin-klienten

I håp om å spare meg 2 x 10 til 15 GB med nedlastingar på ei 3 Mb line hadde eg justert Origin-klienten før eg starta installasjonsløpet på maskin 1 slik at installasjonsfiler skulle ende opp i ein lett tilgjengeleg mappe samt at eg bad om at installasjonsfilene ikkje skulle slettast etter installasjon. Tanken var å flytte innhaldet til maskin nummer 2 og 3 for installasjon. Til mi store overrasking er mappa tom på maskin 1. Eg har stoppa og starta klienten på maskin nummer 2 for å sjå om det kunne vere problemet. Heller ikkje på maskin nummer 2 ligg installasjonsfilene der eg har oppgitt at klienten skal legge dei. Nok ein gong: Amatørar!

SkyDrive – bakdør til alt ditt?

5. oktober 201312. oktober 2013 Arild BjørkKommenter innlegget

SkyDrive er ei sentral teneste i Microsoft si pågående satsing. Ho er tett integrert i Windows 8 og Office 365. Programvare er tilgjengeleg for Windows Vista og 7, OSX og ulike plattformer til mobiltelefonar og nettbrett. Synkronisering av ei SkyDrive-mappe på din brukarkonto i Windows fungerer tilsvarande Dropbox. Det som kan bli eit problem er funksjonaliteten som går under navnet SkyDrive Fetch (Hent filer). Ved installasjon av klienten til datamaskiner blir han slått automatisk på. Brukaren må aktivt velje å slå han av under installasjon:

skydrive fetch paa

Kva tilbyr SkyDrive Fetch (Hent filer)?

Dersom ei maskin står på og har applikasjonen, kan du få tilgong til alle filer på datamaskina fra ei anna datamaskin ved å logge deg på SkyDrive.com. Det inkluderer delte mapper frå andre maskiner og nettverkstasjonar maskina har tilgang til:

skydrive fetch mapper og drives

Ekstra tryggleik, men …

I utgongspunktet krev SkyDrive Fetch at ein oppgir ein ekstra kode for å kople deg til datamaskina du vil sjå eller hente filer frå. Koden blir sendt på SMS eller til ei anna e-postadresse som er lagt opp i kontoinnstillingane på Outlook.com. I tråd med Microsoft sitt fokus på å tilby ei brukarvenleg teneste vil brukaren få moglegheit til å setje opp datamaskina ein loggar inn frå som «Trusted»/ til å stole på. Einingar som ein oppgir at SkyDrive kan stole på, vil få tilgang til dei andre eingane utan den ekstra koden.

skydrive fetch Trusted

Får uvedkommande tilgang til ei datamaskin med tilgang din Outlook.com/SkyDrive-konto, kan dei fritt hente ut alt du har liggjande på maskinene du har kopla opp med SkyDrive Fetch. Dette er ikkje utenkjeleg dersom du har kryssa av for «Keep me signed on» når du loggar deg på Outlook.com/SkyDrive. Ei gullgruve vil vere å få tilgong, via SkyDrive-kontoen din, til ei maskin der alle dine data er lagra, eller ei maskin som er kopla til ein nettverkdisk eller server heime. Det kan gå kaldt nedover ryggen av mindre.

Deaktivere SkyDrive Fetch (Hent filer)

Har du allereie SkyDrive installert, kan du via innstillingar i SkyDrive-applikasjonen slå av SkyDrive Fetch ved å fjerne krysset i «Tillat bruk av SkyDrive for å hente filer på denne PCen«.

Tur: Kløvjavegen til Fjærlandssete

14. september 20133. juli 2023 Arild BjørkKommenter innlegget

Fjærlandssete er ein støl som ligg nordom Fardal og Øvstedalen, tett opp mot Leikanger si austre grense mot Sogndal. Sjølve stølsområdet er idyllisk plassert på austsida av Fjærlandssetevatnet. På vestsida av vatnet finn ein stølen Sumhaug.

Før var den lettaste måte å koma hit å køyre opp Øvstedalen i Fardal og gå forbi Furesete. I dag er det, på grunn av forlenging av vegen i Njøsadalen, lettare å nå Fjærlandssete frå Leikanger. Det forutset at ein køyrer fram til parkeringsplassen ved Tuftahaug. Her er det to alternativ:

Gå via Hottadalen over Seltuftebotnen mot Slettebotnen ved Kalvahaugen like heimom Kalvavatnet.
Gå Kløvjavegen som startar i Geitadalen og kjem saman med stien frå Øvstedalen, litt over Furusete.

Det første alternativet fører deg ein del høgare i terrenget, slik at du må gå ned att på Fjærlandssete.

I dette innlegget tek eg for meg Kløvjavegen som er ein lett familietur på ca 4,5 km. På denne distansen skal du berre opp i underkant av 150 høgdemeter. Det er under halvparten av stigninga til Bjørgahaug frå Njøs. Fordelt over ein mykje lenger distanse betyr det at turen er svært slak. Det næraste eg vil samanlikna han med er turen fram i Henjadalen til Flya. Parkerer du ved bommen Henjadalen er distansen og stigninga mykje lik.

Skilnaden mellom turen fram i Henjadalen til Flya og Kløvjavegen til Fjærlandssete er at førstnemnde går på grusveg og krev ikkje anna enn gode gåsko. Kløvjavegen går over lyng, myrer samt moldete og fuktige parti. Her er det einaste som gjeld gode fjellsko, fjelljoggsko eller støvlar som kan halda veta ute. Ein lettskya dag vil du på eit godt stykke av stien sjå direkte mot Hurrungane i Jotunheimen, samstundes som du ser Gautastølen over Svartavatnet i Øvstedalen. Etter halvgådd tur vil du sjå Furusete, litt nedom Kløvjavegen. Eit kort stykke etterpå går Kløvjavegen saman med stien som kjem opp frå Øvstedalen.

Det er god plass på sælbøen til å setje opp telt eller lavvo, om du vil ta helga der. Har du kjøpt fiskekort, kan du fiske i vatnet. På ein varm sommardag kan du ta turen ned til vatnet og bade frå ei sandstrand. Ver i det minste budd på at det kan bli ei frisk oppleving, spesielt om det er tidleg på sommaren.