Skribent: Arild Bjørk

https://bjrk.no/

Gjenbruk av gamalt utstyr

Arild BjørkKommenter innlegget

Til jul fekk eg overlevert eit gammalt «vrak» som har samla støv i vel eitt år. Maskina var ein gong rimeleg spenstig, men i dag er ho ikkje mykje å skrive heim om. Systemet består av:

  • AMD Athlon XP 2100+
  • 512 MB ram
  • Nvidia Geforce 4 Ti 4200 grafikkort
  • 80 GB HD
  • CD-brennar
  • stort kabinett

I dag er det ikkje mykje musklar. Ikkje har eg Windows-lisens til ho heller. Men erfaringane så langt med Windows XP syner at det eser ut. Programma i dag er større og tyngre. 512 MB ram er eit absolutt minimum for å få XP til å svive rundt. Kanskje fins det system med mindre krav?

Ubuntu har eg testa i ulike versjonar dei siste åra. Det har vore enkelt å få installert og ein har tilgang til all programvare ein måtte ønskje frå «brønnane/depota» til leverandøren. Ubuntu har lagt på seg over tida den også. Ein bør helst ha 512 MB ram for å køyre standardversjonen med det grafiske grensesnittet Gnome. Men det finst ein avart som brukar Xfce som er eit grafisk grensesnitt som skal vere ein del lettare. Denne distribusjonen blir kalla Xubuntu.

Eg lasta ned siste versjon, Xubuntu 8.10, men fann fort ut at ein hadde endra måten Ubuntu/Xubuntu fann fram til type skjerm på frå 8.04-versjonen. Dette hadde negative konsekvensar for mitt oppsett. Etter det eg forstår er det visse problem med å oppdage skjermar som er kopla til maskiner via standard VGA-kabel. Med Nvidia sin drivar kunne eg maksimalt få 640×480. Utan denne drivaren kunne eg få 800×600. Eg fann ingen grafiske verktøy til å justere dette, så eg valde å nedgradere til versjon 8.04 LTS. LTS betyr long time support. Versjonen er frå april 2008 og vil bli vedlikehalden i 3 år, i motsetning til versjon 8.10 som er ein korttidsversjon.

8.04 vart installert frå CD slik at han bruker heile disken. Mitt trådlause 3com USB-kort vart funne og eg fekk lagt inn nøkkel for nettverket. Deretter er nokre ting som må på plass aller først:

  1. cden inneheld ikkje komplett språkstøtte – få på plass all norsk og engelsk støtte
  2. oppdater ubuntu/xubuntu
  3. aktivere Nvidia-drivar eller anna spesiell drivar (det vil kome opp eit spørsmål om det i løpet av punkta over)
  4. opne ein terminal og køyr sudo gksu displayconfig-gtk for å få på plass rett skjerm dersom han ikkje er korrekt oppdaga.
  5. gå inn på innstillingsbehandler og juster skriftsstorleiken dersom han er for liten. Storleik 9 på ein 20″ skjerm med 1600×1200 vart i det minste laget for meg. Eg stilte han opp til 11.
  6. installer via terminal nøkkelringadministrator via terminal/kommandoline med sudo apt-get install libpam-gnome-keyring for å sleppe mas om passord når du skal bruke trådlaust nett. Som standard vert WPA/WEP-nøkkel lagra i ein nøkkelring som ein bør ha eit passord på og du blir bedt om dette passordet kvar gong du skal ha tak i nøkkelringen.

No er det vesentlege på plass. Det er berre å sjå gjennom start-menyen og finne program som er lagt inn. Dersom du saknar eit eller anna er det berre å bruke Legg til/Fjern… under System på start-menyen for å få på plass det du vil ha. Eg tilrår i det minste at du for Xubuntu:

  • Installere OpenOffice.
  • Bruker Pidgin som messenger (Live, Yahoo, AOL, ICQ m.m.)
  • Installere Micrsoft Core fonts-pakken for at t.d. Times New Roman, Arial m.m. skal visast korrekt i Linux.

Når eg har logga på Xfce, brukar systemet berre rundt 128 MB minne. Då har eg også aktivert fildeling via samba. Antivirusprogramvare som i Windows XP dreg på seg 50 – 100 MB, kan ein berre gløyme. Virus for Linux er framandord. Sjølv om nettlesaren Mozilla Firefox dreg på med vel 100 MB, er det god plass til andre program som OpenOffice, Gimp (grafikk/teikning), Mozilla Thunderbird (e-post) og litt anna samstundes. Eg merkar ingen aggresiv diskaktivitet for at systemet skal veksle ut/inn data frå platelageret. Maskina held nok nokre år til med dette oppsettet.

Godt nytt år

Arild BjørkKommenter innlegget

Vi får håpe at ein era med statar med mykje makt tvingar fram sin vilje med løgn og svik er over. I staden for å stå på kvar vår tue og klubbe kvarandre i hel, bør ein lære å snakke saman for å finne ut kva den eine ikkje er nøgd med eller ønskjer å få endra. Skal folkegrupper fritt fram legge under seg areal utanfor landegrensene sine, medan resten av verda står lamma?

Dessverre er nyhende full av eksempel på David mot Goliat-kampar. Har dette løyst noko i løpet av tidas løp?

Er OpenOffice i ferd med å rotne på rot?

Arild BjørkKommenter innlegget

Som ihuga brukar at det einaste reelle alternative til Microsoft sin Office-pakke, er eg sterkt bekymra av bloggen til GNOME og OpenOffice-guru Michael Meeks. Han meiner at prosjektet OpenOffice.org ikkje er godt og treng vesentlege endringar før det er for seint. Statistikken viser at Sun distanserer seg kombinert med at det manglar ein auke frå andre utviklarar. I dag har OpenOffice.org det lågaste talet på aktive utviklarar sidan ein starte å registrere det: 24 stk. Stagnerer OpenOffice.org? Er heile prosjektet for eineveldig styrt til å fungere godt?

Les bloggen til Michael Meeks her.

Harelabb

Arild BjørkKommenter innlegget

Riksrevisjonen har vore etter Skatteetaten med god grunn. Frå tid til anna kjem det artiklar om situasjonen. Den siste eg har sett står i E24. Vi er redusert til å telje tal kontrollar. Er dette greitt?

Å sjå blindt på tal kontrollar vil berre føre til ein ting: Korleis kan ein nå kravet med sterkt avgrensa ressursar? Leiar for Skatterevisorenes Forening set ord på situasjonen:
Skattekontrollene har blitt en salderingspost. Vi frykter at mange av de store fiskene blant skattesvindlerne slipper unna. Dette er alvorlig. Hvis man ikke tar disse, får man konkurransevridning.Det seier alt. Eg treng ikkje legge til noko.

DRM – får pc-brukarane som fortent?

Arild BjørkKommenter innlegget

Eg har skrive fleire innlegg i bloggen der eg seier mi meining om DRM, som eg synes er ei pest og plage. Men no må eg stille meg spørsmålet om det ikkje er pc-brukarane som er årsak til denne vridinga. Er ein ikkje tillit verdig?

Eit uavhengig selskap, 2D Boys slapp ein tittel heilt utan DRM, World of Goo. Det var inga form for kopieringsikring i tittelen. Tilliten 2D Boys har vist spelarane, er kraftig misbrukt. Berre 1 av 10 betalar for spelet. 90% av eksemplara der ute er piratkopiar. Kva seier det oss om vi dreg det over på befolkninga? Er det slik at 90% av jordas befolkning er simple tjuvar som brukar ein kvar moglegheit til å røve til seg fordeler? Har vi sokke så langt at vi drit i arbeidet andre har lagt ned?

  • Kva ville du sagt om 90% av det du jobba med fekk andre æra for med lønsopprykk, bonusar osv?
  • Er det forskjell mellom den som naskar på butikken og den som brukar piratkopiert programvare?

Er du komfortabel med utviklinga, må du ikkje klage når ein eller anna snik til seg ein fordel på din bekostning!

AMD i bakleksa

Arild BjørkKommenter innlegget

Det har vore ei skremmande utvikling på prosessorar det siste året. Sjølv har eg investert i Intel Core 2 Quad 6600 for å kunne handtere videoformatet AVCHD. AMD var aldri aktuell . Dei rota det veldig til med bug på Phenom saman med svak konstruksjon og yting. Dei gamle X2-prosessorane var altfor svake. No kjem Intel Core i7 «Nehalem» på bana og AMD er så godt som parkert. Berre ta ein titt på testen hjå www.hardcoreware.net. Den kraftigaste AMD Phenom X4 9950 har ingen ting å stille opp med.

Held dette fram kan vi fort ende opp med at Intel har monopol på prosessorar til pcar. Vi får håpe at AMD har eit eller to kort i ermet og kjem sterkare tilbake neste år. Eg kryssar fingrane, men held ikkje pusten.

Far Cry 2 eller Crysis Warhead er ikkje bestseljarar

Arild BjørkKommenter innlegget

bestselgerVar innom Steam-kontoen min og såg at Fallout 3 er i sal. Spelet kjem utan DRM med aktivering, i motsetning til Far Cry 2 og Crysis Warhead. Fallout 3 ligg på topp som bestseljar. Far Cry 2 eller Crysis Warhead er ikkje på lista.

Ikkje eingong i kategorien Action er Far Cry 2 eller Crysis Warhead inne på lista over bestseljarar. Eg lurer på kva som er årsaka til dette. Er spela for dårlege eller er det DRM som gjer at spelarane skyr dei?

Besøk http://store.steampowered.com/ og sjekk listene sjølv.