Kategori: Data

Unison fungerer nesten som SyncBack

Arild BjørkKommenter innlegget

Det var ikkje mykje som skulle til for å få Unison til å fungere med nettverksdisken. Eg søkte på unison først og deler av feilmelding. Løysinga låg i første treff frå Google.

Problemet eg hadde var at Unison prøvde å justere rettar for filer kopiert frå maskina til nettverksdisken på nettverksdisken. Det ville ikkje han ha noko av. Eg må difor passe på å legge inn perms = 0 i kvar profil som eg brukar opp mot disken.

Unison har ein grundig metode for å sjekke endringar av filer som meir tidkrevjande enn SyncBack freeware sin måte. Ved å setje fastcheck = true i kvar profil vil Unison gjennomføre ein meir overflatisk sjekk basert dato og tid på filer. Unison vert meir jambyrdig med SyncBack freeware. Unison viser ei liste over filer og mapper der du kan legge inn unntak på dei filer og mappene som du aldri vil synkronisere eller vil hoppe over for denne gong. Dessverre går det ikkje å be om at ei fil skal slettast. Du må bruke utforskaren for å finne og slette ho. Eg skal alltid kunne leve med å legge inn innstillingane i filene til dei ulike profilane eg set opp.

Program for Windows i Linux kan vere til stor hjelp

Arild BjørkKommenter innlegget

Syncback i LinuxEg har enno ikkje greidd å finne eit godt alternativ for SyncBack freeware for Windows frå 2brightsparks.com i Linux som fungerer utan feilmeldingar med min nettverksdisk.

Unison synkronisering gir feilmeldingar og får ikkje overført nye filer til boksen. LuckyBackup, som er eit enkelt grafisk grensesnitt for rsync-kommandoen, har eg fått til å fungere akseptabelt. Eg måtte berre passe på å legge inn innstillinga «–temp-dir=/var/tmp» i profilane. No gir LuckyBackup ei ufarleg feilmelding om at rsync ikkje har greidd å setje dei korrekte rettane på filer som blir overført til nettverksdisk. Synkroniserer eg ein gong til vil eg sjå at fila er overført. Motsett veg er det ikkje problem. Ulempa med LuckyBackup er at det ikkje presenterer ei liste over filer som skal synkroniserast slik som SyncBack og Unison. Dette gjer det vanskelegare å fjerne filer eg ikkje lenger vil ta vare på sidan eg må slette dei på nettverksdisken før synkronisering.

Masse Windows-programvare fungerer under Linux, men du må installere Wine for å køyre han. Wine er enkelt å installere frå Ubuntu programvaresenter. Deretter er det berre å laste ned programmet, dobbelklikke på exe-fila og programmet blir installert og lagt i startmenyen eller du kan be om å få eit ikon på skrivebordet.

Fujitsu Siemens Amilo Si3655 gir ein del utfordringar

Arild BjørkKommenter innlegget

FSAmiloSi3655Dette er ein modell som skapar ein del hovudbry. Maskina spelar ikkje på lag med fullstendig diskkryptering som Truecrypt 6.x eller Compusec 5.2. For begge desse fungerer testprosedyra, men når disken er kryptert så kjem meldinga Operating System Not Found ved oppstart og der vert maskina ståande. “Fordelen” med problemet er at du kan bruke redningscden Truecrypt genererer eller lage ein USB “oppstartsnøkkel” av han på ein minnepinne med Unetbootin. Maskina vil berre starte dersom cd/"nøkkelen" blir brukt.

Med Ubuntu eller Debian aleine installert på maskina får ein same meldinga etter installasjonen. Eg valde å teste OpenSuse 11.3. Han er ikkje er basert på Debian, men utvikla av Novell. Under oppsettet av OpenSuse oppdaga eg at han brukte eit spesielt diskoppsett der eg la merke til at OpenSuse vart sett opp til å starte frå ein utvida partisjon og ikkje frå Master Boot Record. I motsetning til Ubuntu starta OpenSuse utan problem.

Sidan eg er van med Ubuntu-variantar, vart OpenSuse 11.3 litt for framand for meg. Eg måtte berre prøve å installere Ubuntu 10.04 med tilnærma lik partisjonering. Det vart gjort, men etter restart kom den velkjente meldinga Operating System Not Found opp. Eg starta maskina igjen med Ubuntu-cden og starta gparted, ein partisjonseditor. Her såg eg at oppstartspartisjonen ikkje var flagga med boot-flagget og eg sette det. Etter dette starta Ubuntu 10.04.

Ein kollega studerte på problemet. Han flytte disken til ei anna maskin og kunne konkludere med at Amilioen gav blanke i det som låg i Master Boot Record. Han hadde installert Ubuntu med standard installasjonsprosedyre og i motsetning til mi løysing, må ein faktisk fjerne boot-flagget på første partisjonen for at maskina skal starte Ubuntu.

I dag installerte eg den alternative versjonen med Xubuntu med full diskkryptering med standard oppsett. Ved restart proklamerte Amiloen som forventa Operating System Not Found. Eg starta maskina med cden Parted Magic og fjerna boot-flagget frå /boot-partisjonen. No starta Xubuntu utan problem.

For meg kan det sjå ut som om Fujitsu Siemens har modifisert BIOS slik at ein skal hindre at eit virus i Master Boot Record skal skape problem for Windows.

Medfølgjande programvare er ikkje alltid oppdatert

Arild BjørkKommenter innlegget

win7bundling inkompatibelNår eg set opp eigne eller andre sine maskiner, går eg alltid gjennom for å fjerne programvare eg meiner er unødvendig. HP er ikkje dei verste med å leggje med masse. Corel PaintShop Photo Pro X2 var med. PaintShop var noko eg brukte før tusenårsskiftet i gratisversjon 4.15SE. Eg trur det var 1995 eller 1996. Det vart interessant å sjå om det hadde vore noko utvikling dei siste 15 åra, men det første eg la merke til når eg starta programmet var ein advarsel nede til høgre: “Fargeoppsettet har blitt endret til Windows 7 Basic”.

Det viser seg at Corel PaintShop Photo Pro X2 ikkje er kompatibelt med standard Windows Aero grensesnitt og må slå dette av. Corel burde nok lagt med ein nyare versjon. Det var synd, men eg har nok programvare til å gjere lettare redigering av bilete, så Corel PaintShop Photo Pro X2 vart umiddelbart avinstallert.

Ikkje bruk Norman Anti Virus / Security Suite

Arild BjørkKommenter innlegget

For 2 år sidan advarte eg mot Norman som brukte store mengder ressursar på grunn av lite optimalisert programmering. Eg har tilgong til ei nyare Fujitsu Siemens Amilo med 3 års abonnement på Norman. Maskina er rimeleg sprek, men eg har hatt ei oppleving av at ein del ting har vore tregare enn på svakare maskiner.

nvsesvc - high cpu Eg plukka maskina fram att denne veka. Det var ein del Windowsoppdateringar tilgjengeleg og eg la merke til at Norman Anti Virus vart oppdatert til siste versjon. Etter oppdateringa av Norman fekk eg eit klart inntrykk av at maskina vart tregare. Det tok lang tid å logge seg inn på konto og etter kvart sjekka eg opp i kva for prosessar som køyrde i bakgrunnen ved hjelp av Oppgavebehandling.

Nsesvc.exe eller Norman Scanner Engine Service gjorde krav på inntil 100% av prosessor t.d. i løpet av innlogging på brukarkontoen. I bruk, etter innlogginga, la eg også merke til at Norman var svært ressurskrevjande når eg starta program. Eg sjekka brukarstøtteforumet til Norman og såg at det var rapportert tilsvarande problem når eg søkte etter nsesvc.

Norman Scanner Engine Service la òg beslag på i overkant av 125 MB minne. Greitt nok at maskiner i dag har som standard 3 – 4 GB minne, men det får då vere måte på. Andre produkt eg brukar eller har brukt har ikkje hatt i nærleiken slike krav til minne.

Som eit siste forsøk ville eg teste teorien om at dersom eg tok eit fullstendig virussøk av maskina, ville Norman Scanner Engine Service roe seg. Eg sette på scanninga om kvelden og sjekka Oppgavebehandlingen. Stor var overraskinga at denne prosessen også la beslag på i overkant av 125 MB. Minnebruk var det store problemet med Norman tidlegare. Dårleg programmering gjorde at kvar modul lasta virussignaturar i stadenfor at modulane kunne dele på ei samling. Norman lova å rette på dette for 2,5 år sidan, men det ser ut til at dei ikkje har halde ord enno. Scanninga stod på natta over, men var ikkje ferdig om morgonen etter ca 7 timar. Det var siste dråpen!

Mitt råd er å fjerne Norman dersom du har det på maskina og heller bruke eit gratis alternativ. Sjølv om Norman er “gratis” og følgjer pcen, er det ikkje verd prisen/plagene.

Xubuntu-oppdatering stoppa pga feil i filer med informasjon om pakkane

Arild BjørkKommenter innlegget

Den automatiske oppdateringa varsla om at det var nokre oppdateringar tilgjengelege. Eg starta oppdateringa og filene vart lasta ned, men under installasjonen stoppa det med ei feilmelding om at ein pakke, open-office.org-common, inneheldt ei fil utan namn. Etter eit søk på nettet fann eg løysinga:

  1. Opne Terminal (kommandolina i linux) som du finn under Tilbehør i Programmer-menyen.
  2. Slett openoffice.org-common-filene i mappa /var/lib/dpkg/info/ med sudo rm /var/lib/dpkg/info/openoffice.org-common*
  3. Reinstallere openoffice.org-common med sudo apt-get install openoffice.org-common –reinstall

Deretter er det berre å køyre oppdateringa og alt fell på plass.

Ubuntu er ekstra forsiktig

Arild BjørkKommenter innlegget

I Ubuntu 10.04 er det alltid eit ekstra spørsmål etter at du har valt å slå av, starte på nytt eller logge ut. Etter ei tid vart det litt irriterande. Eg har ikkje bruk for funksjonaliteten sidan maskina ikkje har nokon kritisk verdi i eit datasystem. Det tok ikkje lenge før eg fann korleis dette skulle fjernast:

  1. Trykk Alt og F2 samstundes,
  2. Skriv inn gconf-editor,
  3. Naviger til undermenyen apps –> indicator-session
  4. Dobbelklikk på lina suppress_logout_restart_shutdown
  5. Endre verien Verdi frå Usann til Sann

Ubuntu og skjermlayout

Arild BjørkKommenter innlegget

Ubuntu 10.04 LTS er prega av Apple Mac sitt operativsystem ved at dei har endra layout på kor du finn knappane for mininimering, maksimering og lukking. I standard installert Ubuntu 10.04 LTS er knappane på venstre side på toppen av eit vindauge. For ein som ikkje brukar Mac er det uvant å ha det slik, men det er enkelt å rette på slik at ein får ein layout som er slik som Windows, utan å skifte tema/utsjånad:

Her er det du gjer:

  1. Trykk Alt + F2
  2. Skriv gconf-editor
  3. Naviger ned til undermenyen apps-metacity-general
  4. Endre maximize,minimize,close: til menu:minimize,maximize,close
  5. Lukk gconf-editor.

    No skal knappane vere på plass i Windows-stil.

    (X)ubuntu og kryptert heimekatalog (/home)

    Arild BjørkKommenter innlegget

    Eg testa speglkopiering av disken på min Compaq HP Mini 730eo med ein treg Intel Atom N270 prosessor. For å få det til å gå raskast mogleg er det lurt å nulle ut ledig plass. Det er ikkje vits i at verktøya kastar vekk tid på å pakke restar av filer som er sletta eller tilfeldige data som måtte ligge att på ei testmaskin.

    Eg hadde sett opp Xubuntu 10.04 med passord for å logge på og kryptere alt innhald heimemappa. Berbare pcar som er mykje med på reis bør alltid krypterast slik at uvedkomande ikkje kjem til data dersom maskina forsvinn. Eg testa eit skript som skulle generere ei lita og ei stor fil med nullar i heimekatalogen. Under testinga la eg merke til at det var veldig treg skriving til disken. Når skriptet fungerte som det skulle, flytta eg det over til ein katalog som ikkje var kryptert. Nei, eg kunne ikkje køyre skriptet i heimemappa mi. Den underliggande krypteringa ville føre til at ledig plass på disken vart fylt med tilfeldige data og ikkje nullar. Eg testa skriptet att i den nye plassering og så vesentleg skilnad i ytinga.

    Her er skriptet eg nytta for å vurdere skilnad i hastigheit:

    rm *.txt
    dd if=/dev/zero of=kort.txt  bs=1M  count=500
    dd if=/dev/zero of=lang.txt  bs=1M  count=2000

    Den første lina fjernar eventuelle txt-filer i mappa skriptet køyrer i. Den andre lina lagar ei fil med namnet kort.txt med nullar på ca 500 MB. Den siste lina lagar ei fil med namnet lang.txt på ca 2 GB. Resultat av dei ulike køyringane:

    I ukryptert mappe

    524288000 byte (524 MB) kopiert, 11,0566 s, 47,4 MB/s
    2097152000 byte (2,1 GB) kopiert, 60,5938 s, 34,6 MB/s
    524288000 byte (524 MB) kopiert, 10,5128 s, 49,9 MB/s
    2097152000 byte (2,1 GB) kopiert, 58,0929 s, 36,1 MB/s
    524288000 byte (524 MB) kopiert, 9,88656 s, 53,0 MB/s
    2097152000 byte (2,1 GB) kopiert, 60,076 s, 34,9 MB/s

    I kryptert heimemappe

    524288000 byte (524 MB) kopiert, 46,9183 s, 11,2 MB/s
    2097152000 byte (2,1 GB) kopiert, 186,47 s, 11,2 MB/s
    524288000 byte (524 MB) kopiert, 45,9577 s, 11,4 MB/s
    2097152000 byte (2,1 GB) kopiert, 190,433 s, 11,0 MB/s
    524288000 byte (524 MB) kopiert, 45,7656 s, 11,5 MB/s
    2097152000 byte (2,1 GB) kopiert, 184,776 s, 11,3 MB/s

    Det er ein vesentleg reduksjon i skrivehastigheit i den krypterte heimemappa.

    Fullstendig kryptert disk
    (Dette er berre tilgjengeleg på alternativ installasjon-cd av dei ulike Ubuntu-variantane.)

    524288000 byte (524 MB) kopiert, 23,5097 s, 22,3 MB/s
    2097152000 byte (2,1 GB) kopiert, 129,156 s, 16,2 MB/s
    524288000 byte (524 MB) kopiert, 27,1944 s, 19,3 MB/s
    2097152000 byte (2,1 GB) kopiert, 127,024 s, 16,5 MB/s
    524288000 byte (524 MB) kopiert, 23,0415 s, 22,8 MB/s
    2097152000 byte (2,1 GB) kopiert, 129,141 s, 16,2 MB/s

    Også her er det ein vesentleg skilnad mot ukrypterte data.

    Det kan sjå ut til at ein fullstendig kryptert disk er raskare enn kryptert heimemappe, men då må ein hugse på at heile systemet er kryptert som fører til at alt blir like tregt. Med kryptert heimemappe er det berre dine personlege filer samt filer med innstillingar og data til ulike program som blir lagra kryptert og påvirka av den lågare farten. Programfiler og modular osv ligg i ukrypterte mappestrukturar og vert lasta med maksimal fart.

    Konklusjon
    Skal du velje ein av delene bør du velje kryptert heimemappe.